Salmos 31:2-18

²Bze̱ naga chi'a, ne bselá neda'. Bze̱ chuchu neda', ne bucú'uj neda' chee̱ la'.

³Nacu' Benne' dxuzé̱ chuchu' neda', ne dxucú'uju' neda'. lawe' da nacu' li lazre' gulé'enu' neda' neza, ne gusi'u neda' neza na'.

⁴Bebéaj neda' lu xralaj da ba zaj nucueze̱', chee̱ xele̱l-le̱' neda'. Lue' nacu' Benne' dxuxúe̱' neda'.

⁵Lu na'u dxuzúa' bénne'du xu'a, Xran. Lue' bexá'awenu' neda', Dios li lazre'.

⁶Dxecuídeda' benne' ca' dxelebeza lazre̱' dios ca' quebe bi zaj zaca. Neda' dxebeza lazra' Xrana' Dios.

⁷Béle̱'e̱da', ne sua' lu da ba neza lawe' da dxexache lazru' neda'. Caní dxunu' lawe' da dxelé'equeznu' ca da dxezaca zi'a. Nézenu' ca dxedéa' lu da ba xa'.

⁸Quebe bdeu' neda' lu na' benne' ca' dxeledábague̱' neda'. Bze̱ chuchu' neda' tu lataj chawe'.

⁹Bexache lazre' neda', Xrana' Dios, lawe' da zua' lu da ba xa'. Ba bebizre nisa xuzru xiaj lawa' lawe' da dxewí'ine lazra' dute̱ bénne'du xu'a, ne dute̱ be̱la' dxen chia'

¹⁰lawe' da dxedé xel-la' nabán chia' lu da ba xa', ne dxedéa' iza chia' ca' dxebezre lazra'. Dxedú lazra' lawe' da nabaga' zria, na' dxelelá zrita xu'a.

¹¹Xúgute̱ benne' ca' dxeledábague̱' neda' dxelecuídene̱' neda', na' benne' walízr chia' dxuluzúe̱' neda' chelá'ala, na' benne' zaj núnbe'e̱ neda' dxelecuase̱' neda'. Benne' ca' dxelelé'ene̱' neda' la neza dxuluzrúnnuje̱' naga zua'.

¹²Benne' caní ba gulal-la lazre̱' neda' ca dxelal-la lazre̱' tu benne' gate. Naca' neda' ca tu xé'ena xu da nalá'a.

¹³Dxenda' dizra' schanni' da dxelenná benne' zante̱ chia', na' gátete̱ze zua da dxuchebe na neda'. Dxácate̱ na' dxelune̱' tuze dizra' bi xelune̱' chia', ne zaj nune̱' xelútie̱' neda'.

¹⁴Neda' dxuxrén lazra' Lue', Xran. Dxennía' nacu' Lue' Dios chia'.

¹⁵Lu na'u Lue' zaj xu'u zra chia' ca'. Bselá neda' lu na' benne' ca' dxeledábague̱' neda', ne lu na' benne' ca' zaj nau zi' xuzre̱' neda'.

¹⁶Lu xel-la' szren chiu' bxue neda', we̱n zrin chiu'. Lu xel-la' dxexache lazre' chiu' bselá neda'.

¹⁷Quebe gu'u lataj xedué'eda', Xran, lawe' da dxuláwizra' Lue'. Be̱n xelexedué'e benne' ca' dxelebéaj xíchaje̱' Lue'. Be̱n xelezúa zrie̱' lu lataj ba xa'.

¹⁸Be̱n quebe gaca xelenné̱ benne' ca' dxelezí xe̱'e̱, benne' ca' dxelenné̱' da cale̱la chee̱ benne' xrlátaje ca', da dxelenné̱' lu xel-la' dxulucá'ana szren cuina, ne lu xel-la' dxulucá'ana ditaj benne' caní.