SALMOS 31:14-24

¹⁴Pero TOTECO, na nimotemachía ipan ta huan niquijtohua: “¡Ta tinoDios!”

¹⁵Sesen tonali cati niitztoc momaco eltoc. Techmanahui inimaco nocualancaitacahua cati nechtaijyohuiltijtinemij.

¹⁶TOTECO, ma monexti moteicnelijcayo ipan moxayac quema techtachilía na, nimotequipanojca. Techmaquixti pampa ta techsenicnelijtoc.

¹⁷TOTECO, na nimitztemojtoc. Amo xiquincahuili ma nechpinahualtica. Xiquinpinahualti masehualme cati amo cuajcualme. Quena, inijuanti mocamatzacuase quema tiquintzontamiltis.

¹⁸TOTECO, ayecmo molinis ininenepil inijuanti cati istacatij quema ya mictose. Ayecmo itztose inijuanti cati mohueyimatij quema camanaltij para techtaijilhuise tojuanti cati tinemij xitahuac moixpa. Quena, xiquinmicti cati mohueyitalíaj huan techmahuispolohuaj.

¹⁹Pero ta, nelía hueyi moyolo ica inijuanti cati mitztepanitaj huan tiquinmocuitahuía. Nelía cuali motaicnelilis cati ticajoctoc para tojuanti cati timotemachijtoque ipan ta, tojuanti cati miyacapa titematiltijtoque para san ta tihueli techmanahuis.

²⁰TOTECO, ta techtatía campa ixtacatzi tojuanti cati timitztepanitaj, huan nepa ta timocahua tohuaya. Yeca fiero masehualme amo hueli techajsise ica cati quisencajtoque. Quena, momaco techtatía huan amo aqui cati techmahuispolohua hueli techajsis.

²¹Nimitztascamati, TOTECO, pampa tijchijqui huejhueyi tamanti para technextilis moteicnelijcayo. Ica temachili techyahualojtoc para techmanahuis ten nocualancaitacahua.

²²TOTECO, nimoilhuijtiquisqui para techtahuelcajtoya. ¡Pero amo cana! Tijcajqui quema nimitztzajtzili techpalehuiqui, huan technanquili.

²³Nochi amojuanti cati aniaxcahua TOTECO, xiquicnelica pampa yaya quinmocuitahuía cati itztoque temachme. Pero ica masehualme cati mohueyimatij, TOTECO quintaxtahuía hasta ica itanca nochi cati amo cuali quichijtoque.

²⁴Nochi amojuanti cati anmotemachíaj ipan TOTECO, xipaquica huan ximosemacaca.