Salmos 27:3-14

³Láqueze xeléchaj tu cue' benne' dxjaque̱' wedil-la neda', benne' ca' dxeledábague̱' neda', quebe zrébequeza'. Láqueze xuluzúe̱' neda' lu wedil-la, neda' guxrén lázrequeza' Dios.

⁴Tu da gunábeda' Xránadxu Dios. Da nigáze sa lazra', da naca na chee̱ sua' lizre Xránadxu xúgute̱ zra gaca bana', chee̱ gulaba lazra' ca naca da xrtante̱ chee̱ Xránadxu, ne chee̱ guchálajle̱na' Le̱' lu xudau' lá'azxa chee̱'.

⁵Le̱' gucache chawe̱' neda' lu lataj lá'azxa chee̱' lu zra dxaca da cale̱la. Gucache chawe̱' neda' lu lataj cheé̱queze̱' naga zúaqueze̱'. Guzúe̱' neda' tu naga se̱ cháweda'.

⁶Nadxa gune̱' guzétaja' benne' dxeledábague̱' neda', ne zaj naxéchaje̱' neda', na' nen dute̱ xel-la' dxebé gutia' béadu ca' guzúa'-ba' lu cugu chee̱'. Gúl-laqueza', ne tu güe lá'anazqueza' Xránadxu.

⁷Xran, ben chi'a gate ne dxuláwizra' Lue'. Bexache lazre' neda', ne beche̱be chia'.

⁸Lu xichaj lázrdawa' benda' chi'u, gunníu': “Bexilaj chia'.” Xexílaja' chiu', Xran.

⁹Quebe gucache lau' chia' neda'. Lu xel-la' dxezrá'a chiu' quebe xebigu' naga zua' neda', we̱n zrin chiu'. Nacu' Benne' dxácale̱ne̱' neda'. Quebe gusanu' neda', ne quebe cueaj xichju' neda', Dios, weselá chia'.

¹⁰Lácala xulusán xra xrna'a neda', tu xecá'azqueze Xránadxu Dios neda'.

¹¹Bse̱de neda' da dxaca lazru' guna', Xran, ne ble'e neda' da li lazre' da dxal-la' guna', lawe' da zaj naxán benne' dxeledábague̱' neda'.

¹²Quebe gu'u lataj benne' dxeledábague̱' neda' xelune̱' chia' da dxelaca lazre̱' lawe' da zaj naxechaj benne' we̱n lazre' neda' nen benne' dxelaca lazre̱' xulusaca zi'e̱ neda'.

¹³Xránadxu Dios guche̱be lazre̱' le'eda' da xrlátaje chee̱' naga gaca bana'. La quebe guxéajle̱'a da nigá, na' gute ni'a na'a.

¹⁴Le cueza xelá' Xránadxu. Le gutipa lázrele, na' Le̱' guzé̱ chúchue̱' le'e. Awe', le cueza xelá' Xránadxu.