SALMOS 25:6-17

⁶TOTECO, xiquelnamiqui moteicnelilis cati tijpixtoc para nochipa, cati hasta ten huejcajquiya titenextilijtoc, huan yeca techtasojta.

⁷Amo xiquelnamiqui notajtacolhua cati nijchijqui quema nitelpocatixtoya. Xiquelcahua quema nimotepanitayaya moixpa. TOTECO, techelnamiqui ica motaicnelilis pampa hueyi moyolo icana.

⁸TOTECO, ta nelía ticuali huan tixitahuac. Yeca tiquinnextilía tajtacolchihuani nopa cuali ojti cati ipan ma nejnemica.

⁹Tiquinyacana cati moechcapanohuaj ipan nopa ojti cati más xitahuac. Quena, tiquinmachtía inijuanti cati quitemohuaj taya mopaquilis.

¹⁰Quema se masehuali quitoquilía motanahuatil, TOTECO, nochi ojti cati ipan tijhuica quinextilía motaicnelilis, huan quinextilía para ta tiitztoc tixitahuac.

¹¹¡TOTECO! Techtapojpolhui notajtacol masque nelía hueyi. Techtapojpolhui pampa quej nopa tiquijtojtoc tijchihuas.

¹²TOTECO, ica masehualme cati quiimacasij mitzixpanose, tiquinnextilis nopa cuali ojti cati tijtapejpenijtoc para inijuanti.

¹³Tiquintiochihuas miyac, huan ininconehua quiselise nopa tali cati tiquinmacas.

¹⁴TOTECO tiquinpohuilía cati eltoc ipan moyolo inijuanti cati mitztepanitaj huan quiimacasij mitzixpanose. Quena, tiquinnextilía nochi cati inihuaya timocajtoc masehualme.

¹⁵Nochipa nimitztemohua TOTECO, huan nijchiya para techpalehuiqui, pampa san ta tihuelis techmanahuis ten ni taquetzti.

¹⁶Techtachili, TOTECO, huan xijpiya hueyi moyolo ica na, pampa niitztoc noselti huan nimoyoltequipachohua.

¹⁷Nimoyoltequipachohua ica tahuel miyac tamanti cati ohui. Techmanahui ten nopa tequipacholi.