SALMOS 22:3-18

³Huan masque quej nopa eltoc, ta quejipa titlatzejtzeloltic. Nochi tohuejcapan tatahua tiisraelitame mitzyahualojque huan mitzhueyichijque.

⁴Totatahua mochixque ipan ta. Quena, motemachijque mopan ta huan ta tiquinmanahui.

⁵Mitznojnotzque quema tlaijiyohuiyayaj huan tiquinmaquixti. Mopan ta motemachijque huan amo tiquinpinahualti.

⁶Pero na nimomati quen se pilocuiltzi huan amo nise masehuali. Sequin san nechhuetzquilíaj huan sequinoc nechcualancaitaj.

⁷Nochi catli nechitaj san noca paquij, huan tlancuitzihuij huan motzonojolinía,

⁸huan quiijtohuaj: “Yaya catli motemachía ipan TOTECO, huajca ma tiquitaca sintla quimaquixtis. Sintla nelía quiicnelía, ma quimanahuiqui.” Quej nopa quiijtohuaj masehualme.

⁹Pero TOTECO, na nijmati para techpalehuijtoc. Techquixti iijtico nonana. Techmocuitlahuijtoc hasta tlen quema noja nichichiyaya.

¹⁰Huan quema nitlacatqui ya ipa nimotemachijtoc ipan ta. Nochi tonali tieltihualajtoc tinoTeco Dios.

¹¹Amo techtlalcahui san pampa hualajtoc ni tequipacholi huan amo aqui seyoc catli hueli nechpalehuis.

¹²Miyaqui nocualancaitacahua nechyahualojtoque quen torojme catli mosisiníaj. Quena, nesij quen nopa huejhueyi torojme catli itztoque ipan tlali Basán.

¹³Nanalcaj quen tecuanime catli mosisiníaj. Camachalohuaj huan nechmelactlachilíaj.

¹⁴Na nimomati quen atl catli mopatzcatoc huan campa hueli toyajtoc. Nochi noomiyo lelecuecatoc. Noyolo eltoc quen cera catli atiya.

¹⁵Tlantoc nochi nochicahualis. Nijpiya nocamac huactoc quen se chachapal tepalcatl, huan nonenepil tlatzquitoc ica nocamacholec. Techtlalijtoc campa tlahuactoc huan campa onca miquilistli.

¹⁶Masehualme catli amo cuajcualme nechyahualojtoque quen chichime. Quicocoyotztoque nomax huan noicxihua.

¹⁷Hasta huelis nijpohuas noomiyohua, pampa sesen nechcocohua. Nocualancaitacahua nechsentlachilijtoque huan san noca paquij.

¹⁸Momajmacaj catli nimoquentiyaya. Quena, mahuiltíaj ica piltetzitzi para quiitase ajqueya quitocaros sesen noyoyohua.