Salmos 22:2-20

²Bab-Dummadye, ibginedba an bese gornadaenad, gwen be an-abin-imakdasulid. Mutikidba an bese gornadabalinad, gwen be an-abin-imakdasurbalid. An obunnodisulidba nue-geggus itolegusad.

³Be dule-islidikidid, Israel-dulemar bega namakmalad.

⁴Anmar-dadgan begi bensurgusmalad. Begi-bensurgusmaladba be bendaknonikid.

⁵Bese-gochamaladba be bendaknonikid. Begi-bensurgunonimargu, be obinge-imaksasulid.

⁶An dulesuliyob itoleged, napa-nus-musgimakdiidyob itoleged. Dulemar ibmar-dodogedga an-imaknanaid, bela dulemar isdarsun an-dakmalad.

⁷An-dakarmalale, anga alliardamalad. Anga akar-akar gunanai damarbalid, nono ege-ege gunanai damarbalid. Weyob sogmalad:

⁸“Bab-Jehováʼgi bensurye-sogdiid, degite, Bab-Dummad e-bendakdado. Bab-Dummadgi-wergudiiye-sogdiid, degite, Bab-Dummad-e-sunnagwad we-ibmargi e-ollor-imakdado.”

⁹Bab-Dummadye, sapidukugi-an-maigu, bee be an-odenonikid. An-nan-nukugi nue-obunnogega be an-imaksabalid.

¹⁰Bab-Dummadye, sapidukugi-an-maigu, be nue an-akwisad. Amba sapidukugi-an-maigu, bato be an-Bab-Dummadid.

¹¹Bab-Dummadye, mer wargwen be an-mete, ar an surbinsa itoged, ar dule-an-bendaked gwen nikasulid.

¹²An-isdarmalad an-ebiris gudimalad, Basán-moli-bebe-nikad-ursirmaladyobi an-ebiris gudimalad.

¹³Igi-achumigur masbina uurmaknagusdae, igi-san-gasale, ichimaknagusdae, deyob, an-isdarmalad angi gwisgunonimalad.

¹⁴Dii-napagi-eolenaiyob bela an-san na itoged, bela an-garmar nue-gwatiris itolebalid. Igi-baka-gwallu soo-abin daluddae, deyob, an-ulubgi an-gwage nade an itoged.

¹⁵Dobedba bela an-gaya dinguded. An-gwabinse-bakale, gege bar banamakgusad. Napa-urba bato ber an megisayob na itoged.

¹⁶Dule-isganamar achu-soemaladyob an-ebiris gunanaid. Bela an-argan, an-nag-matarse-bakale, uudu imaksamalad.

¹⁷An-garmar daled daklegusad. An-isdarmaladi an-indaknanaisulid, an-ebiris an-dakbukwad.

¹⁸An-mormar mimismarsunnad, an-mor-suega, egi wilubdaknanai gusmalad.

¹⁹Bab-Jehováʼye, be an-niga-ogannogedid. ¡Mer be angi bangue! ¡Gwae be an-bendakdage!

²⁰Mer es-suidse-oburgwilegega be an-imake. Dule-achumaryob-gudimaladgi be an-bendake.