Salmos 21:1-12

¹David we-namaked narmaksad. Namakmalad-e-iduedga soglenaid. Bab-Jehová, be-ganguedgi rey weligwar itoged. E-isdarmaladgi-nakwega be imaksadba, rey nue-weligwar itoged.

²Bab-Jehová, e-ulubgi ibmar-abediid ega be uksad. Ibmar-bese-egichisadi, mer an ega gwen ukodeeye be sogsasulid.

³Bab-Jehová, reygi be nued binsasad. E-nonogi, gurgin-olobiid ega be sisad.

⁴We-reyde, san-burba-dula-gudigued bese egichisad. Suitii degisadegu dula-gudiguega be imaksad.

⁵Bab-Jehová, be rey-bendakedba, rey bila-ononanaidgi-nakwega be imaksad. Be-bendakedba, e-gangued dummarba naded. Be-bendakedba, e-nug nue be odungusad. Bela-bela e-gangued-yeerdakleged reyga be uksabalid.

⁶Bab-Dummad, reygi nuedbi degisadegu be binsamaid. Eba be gudiidbali, rey weligwar itodaed.

⁷Bab-Jehová-Bur-Birigined-e-sabgued geg bergusoggu, rey a-Bab-Jehováʼgi bensulidbali, gandik megoed, onolegosulid.

⁸Bab-Jehová, be-ganguedgi bela be-isdarmalad bese galegoed, bela begi gwisgudidimalad bese galebaloed.

⁹Bab-Jehová, be nonikile, be-isdarmalad sooga be obinyoed. Bab-Jehová, be ulude-sogele, igi soo bela ibmar-obelodae, deyobi, bela be-isdarmalad bese bergumaloed, bela bese girgumaloed.

¹⁰Bab-Dummad, bela we-napneggi be-isdarmalad-e-mimmigan be osulogoed, dulemar-abargi bela e-anagan be sate imakoed.

¹¹Amba akar be-imakbimalandibe, amba gwen be-oakalogosurmalad. Ibmar-isgana-imakega igar-amimardibe, gwen imakosurmalad.

¹²Be-warsi be-isdarmaladgi be oyodogu, be-abin yogasaar duurmakdemaloed.