SALMOS 19:5-13

⁵Huan tonati quisa mojmostla huan yohui ipan iojhui ica paquilistli queja se telpocatl quisa ipan ichaj para mosihuajtiti. Quena, nopa tonati mochihua queja se motlalojquetl tlen paqui motlalohua pampa quimati quintlanis ne sequinoc.

⁶Tonati quisa elhuicactli inacastla huan quimaca huelta hasta ne seyoc inacastla. Axaca huelis motlatis para ax tonalmiquis.

⁷Ileyes TOTECO eltoc senquistoc cuali, huan temaca yancuic yolistli. Huelis timotemachise ipan itlajtol, pampa ya nopa quichihua ma tlalnamiqui se tlacatl tlen moicnonequi.

⁸Quena, itlanahuatilhua TOTECO eltoc melahuac huan xitlahuac. Quinmaca paquilistli tlacame ipan ininyolo. Quena, sesen tlamantli tlen TOTECO techilhuijtoc ma tijchihuaca eltoc queja se tlahuili tlen chicahuac. Techtlahuilía toojhui para tiquitase.

⁹Senquistoc cuali para ma tijtlepanitaca TOTECO huan ma tiquimacasica para tiquixpanose. Elis cuali para nochipa. Tlen TOTECO quiijtojtoc para ma tijchihuaca, ya nopa melahuac. Quena, ya nopa temachtli.

¹⁰Noja más nijpatiita que oro. Quena, noja más cuali que miyac oro tlen senquistoc cuali. Quema se tlacatl quiselía Itlajtol Toteco ipan iyolo, eltoc más tzopelic que se sayolnectli tlen yancuic quipatzcatoque.

¹¹Nopa miyac tlanahuatili nechmacaj tlalnamiquistli, na niitlatequipanojca, para ma ax nitlajtlacolchihua. Tlen quitoquilía itlanahuatil TOTECO quitlanis miyac.

¹²Axaca huelis momacas cuenta tlen itlaixpanolhua sesen huelta quema quichihua tlen ax cuali. TOTECO, xinechtlapojpolhui notlajtlacolhua tlen ax nijmatiyaya intla nijchijtoya.

¹³Huan xinechpalehui para ax nimohueyimatis, huan ax quema ma nitlajtlacolchihuas ica nopaquilis. ¡Axtle! Amo xijcahua tlajtlacoli ma nechnahuati. Queja nopa nielis se tlacatl tlen axaca huelis nechteilhuis ica niyon se tlamantli. Huan niitztos nitlatzejtzeloltic.