SALMOS 19:5-11

⁵Huan tonati quisa mojmosta huan yahui ipan iojhui ica paquilisti quej se telpocat quisa ipan ichaj para mosihuajtiti. Quena, nopa tonati mochihua quej se motalojquet cati paqui motalohua pampa quimati quintanis ne sequinoc.

⁶Tonati quisa ilhuicacti inacasta huan quimaca huelta hasta ne seyoc inacasta. Amo aqui huelis motatis para amo quitonalmictis.

⁷Ileyes TOTECO eltoc senquisa cuali, huan temaca yancuic nemilisti. Huelis timotemachise ipan icamanal, pampa ya nopa quichihua ma talnamiqui se masehuali cati moechcapanohua.

⁸Itanahuatilhua TOTECO eltoc melahuac huan xitahuac. Quinmaca paquilisti masehualme ipan iniyolo. Quena, sesen tamanti cati TOTECO techilhuijtoc ma tijchihuaca eltoc quej se taahuili cati chicahuac. Quitaahuilía toojhui para tiquitase.

⁹Senquisa cuali para ma tijtepanitaca TOTECO huan ma tiquimacasica para tiquixpanose. Elis cuali para nochipa. Cati TOTECO quiijtojtoc para ma tijchihuaca, ya nopa melahuac. Quena, ya nopa temachti.

¹⁰Noja más nijpatiita que oro. Quena, noja más cuali que miyac oro cati senquisa cuali. Quema se masehuali quiselía Icamanal Toteco ipan iyolo, eltoc más tzopelic que se sayolnecti cati yancuic quipatzcatoque.

¹¹Nopa tanahuatilme nechmacaj talnamiquilisti, na niitequipanojca, para amo ma nitajtacolchihua. Cati quintoquilía itanahuatilhua TOTECO hueyi quitanis.