Salmos 18:9-48

⁹Bab-Jehová mee mogir-egasad, geb abali aidealid, mogir-gudureged-birgi aidealid.

¹⁰Bab-Jehová baliwitur-querubinʼye-nugad-birgi-sii, mogir-imbaba nadapid. Burwa-gandik-gormaidba gukumai gualid.

¹¹Bab-Dummad neg-gudureged-abargi nadapid. E-irwa mor-dummad-naiyob mogir nagusad. We-mogir dii-dummad-widanikiyob dakle sigisad.

¹²Bab-Jehová-sabsur-gadedbali, mogirmar aisakided, mogirmar dii-akwamaryob mileded, sogunmar ginnitibi mileded.

¹³Bab-Jehová nibneg-akale, mogirmar-dii-akwamaryob-milemaid-abalagine, sogunmar-ginnitibi milemaid-abalagine, mala-gollomakmaiyob binnasuli sunmakded. Bab-Jehová-Bur-Birigined-e-sunmaked bela neg-gaded.

¹⁴Bab-Jehová sigu-milegeyob e-isdarmaladgi mar-odealid. Bab-Dummad e-isdarmalad-oduurmaksad, e-isdarmalad-oabarmakega imaksad.

¹⁵Bab-Jehová, be-uludedbali demar-urba-napa-naid mag-dakle gunonikid. Bab-Jehová, be-bunnodedbali, napasaila daled gunonikid.

¹⁶Bab-Jehová nibneg-akale, anse e-argan oyononikid. An demar-wilagi-gundilenai an-ononnonikid.

¹⁷Bab-Jehová an-isdarad-buledgi an-bendaksad. Bab-Jehová isdar-an-dakdimaladgi, an-ollor-imaknonikid. An-isdarmalad-angi-obinmaladgi an-abonononikid.

¹⁸Boniganba-an-galitonaidgi an-isdarmalad angi gwisgunonikid. Agine, Bab-Jehová an-bendaknonikid.

¹⁹Bab-Jehová wile-an-dakedbali, an-bendaknonikid, neg-nuedgi an-ogwisgunonikid.

²⁰Bab-Jehová an ibmar-nued-imakedba anga ibmar-nued uked. Ibmar-isgana-imakdisulidba nued angi binsaed.

²¹Ar Bab-Jehová-Igar-Maidba an gudiid, ibmar-isgana an imakdisulid, Bab-Dummadgi an bangudisulid.

²²Ade, bela e-igar-uksad an nue-gasa gudiid, e-Igar-Maidgi an bangudisulid.

²³Bab-Jehováʼga sogedba an gudiid, ibmar-isgana-imaklegedgi an na san-bargas gudiid.

²⁴Bab-Jehová an ibmar-nued-imakedba anga ibmar-nued uked. Ibmar-isgana-imakdisulidba nued angi binsamaid.

²⁵Bab-Jehová, dule-beba-bane-bane-inniki-nanadiidgine, egi be bane-bane inniki damogad. Bab-Jehová, dule-igar-innikigwadba-nanadiidga, ega be inniki ibmar-imaked.

²⁶Bab-Jehová, dule-bega-gakansasulidga, be gakansasurmogad. Be dule-emar-yardakedgardi, e-igar e-ibe be obured.

²⁷Bab-Jehová, dulemar na-san-bipi-imakdimalad, bonigangi-obinega be imaked. Dule-na-san-dummarba-imakdimaladdina, be sabsur-wioged.

²⁸Bab-Dummad-Jehová, be dula-gudii an-imaked. Bab-Jehová, an bonigan-abalagi-gudiidgi, san-burba-dula-gudii be an-imaked.

²⁹Bab-Jehová, be-an-bendakedbali, sordamar-danar-bila-onomalad an ogilogoed. An-Bab-Dummad, be-an-bendakedbali, neggweburmar-galu-matusulid-nikad an obelogoed.

³⁰Bab-Dummad-e-ibmar-imakedi innikigwad imaked, e-gayaburba sunsogedid. Bab-Jehová dule-egi-dukumaladga sigu-abgaedyob gued.

³¹¿Doa Bab-Jehováʼyob Bab-Dummadga mai? Dule sate. Unnila Bab-Jehováʼbi maid. ¿Doa Bab-Dummadyob-gangued mai? Dule sate. Unnila Bab-Jehováʼbi maid.

³²Bab-Jehováʼbi unnila anga gargangued ukmaid, Bab-Dummadbi dobsuligudii an-imaked.

³³Bab-Dummad goe-sapur-abarmakedyob an-oabarmaked, yar-billiganaba geg baparmakega an-imaked.

³⁴Bab-Jehová an-surgan ogannoged, adi, an nabir bila-onogegar. Bab-Jehová an-swidamar ogannoged, adi, nabir warsi-esgoro-gordikidbiid an dopee imakegar.

³⁵Sigu-abgaedyob be an-irwa gwisgued, be-garganguedgi be an-bendaked. Be nued-angi-binsaedba nasguega be an-imaked.

³⁶Bab-Jehová, an nabir nanaega, melle an aimukuega, anga be neg-ollor-dummad nasiksad.

³⁷An an-isdarmalad-baregitegusgua, an indaksasulid, an bargadapid. Bela an-isdarmalad-obelogedse an imaksad.

³⁸Bela-bela an an-isdarmalad naibi-imaksad, degisoggu, gege bar angi gwisgu gusmalad. An-isdarmalad anse nue-galakusmalad.

³⁹Bab-Jehová, bila-onogega be an-ogannosad, an-isdarmalad anse-ibitogega be imaksad.

⁴⁰An-isdarmalad anse-galakudedba, wakinnega be imaksad. Deyob isdar-an-dakdimalad an obelosad.

⁴¹An-isdarmalad aisaar dule-e-bendakegala, emarse gornanai gusmalanad, dule-e-bendaked sate gusmalad. Bab-Jehováʼse gochamalanad, Bab-Jehováʼdi abin-imaksasulid.

⁴²An-isdarmalad anse sanyob ichi-ichi gusad. Amar ukub burwa-abin-mileddaedyob anse gusmalad, sabsur-enalenai anse gusmalad.

⁴³Bab-Jehová, dule-angi-urwedimaladgi be an-bendaksad, dule-yar-baid-baidgi-bukwamalad-e-dummadga be an-imaksad. Dulemar-aku-an-dakmalad an-maiga gunonimalad.

⁴⁴Ibmar-imakoye an sogsale, a-dulemar, yog anba ibmar-imakar damalad. Wemar-Israel-dulesurmaladi, an-nug odummodimalad.

⁴⁵We-Israel-dulesurmaladi, an-gaya-itosale, nig-argwate damalad, e-dukued-yaba-bukwa-noarmalale, wawanmakdani noardamalad.

⁴⁶¡Bab-Jehová dula-mai! ¡Bab-Jehová, unnila bebi an-bendaked maid! ¡Be-nug an odummosun! Bab-Jehová, be an-abonogedid. Be-nug bela-bela odummolesun.

⁴⁷Bab-Dummad anga an-isdarmalad-buged-mai imaksad, Bab-Dummad, dule-yar-baid-baidgi-bukmalad an-maiga-gumalaga anga imaksad.

⁴⁸Bab-Dummadye, an-isdarmalad-angi-gwisguargua, be an-abonononikid. An-isdarmaladgi-obinega be an-imaksad, dule-ursilimaladgi be an-ollor-imaksad.