SALMOS 18:9-40

⁹Pampa Toteco Dios quitlapo nopa cortina tlen elhuicac, huan temoc para nechpalehuis. Nejnentihualayaya ipan miyac mixtli tlen nelyayahuic.

¹⁰Toteco Dios tlejcoc ipan ieltlapal se querubín elhuicac ejquetl, huan patlantihualajqui ipan ajacatl.

¹¹Yajaya motzajqui ica tzintlayohuilotl, huan atl quiyahualo para axaca quiitasquía.

¹²Tlapetlanilotl quiyacantihualajqui quema ajsiyaya yajaya tlen tlahuel tlahuía. Huan nojquiya huetzqui tesihuitl huan tlicoli xaxahuacatoc.

¹³TOTECO quichijqui ma quicaquica itos queja se tlatomonilotl tlen quisqui elhuicac. Quena, Toteco Tlen Más Hueyi tlahuelchijqui. ¡Tlahuel miyac tesihuitl huan tlicoli xaxahuacatoc huetzqui!

¹⁴Quimajcajqui cuatlamintli ma quinajsi nochi nocualancaitacahua, huan inijuanti cholojtejque. TOTECO quinhuitejqui ica hueyi tlapetlanilotl huan quintzontlamilti.

¹⁵Quema TOTECO tlailpitzqui, nochi nopa atl ipan hueyi atl san sejco momanqui hasta nesqui nochi nopa tlali tlen mocahua atzintla campa más tlahuejcatla. Ica itlajtol TOTECO mopannexti itzinpehualtil tlaltepactli, pampa yajaya cualanqui.

¹⁶Huan TOTECO quimelajqui ima hasta campa más huejcatla, huan nechquixti tlen nopa hueyi atl.

¹⁷Nechmaquixti ininmaco nocualancaitacahua tlen quipixque huejhueyi chicahualistli. Quena, nechmanahui tlen nocualancaitacahua tlen más quipixque chicahualistli que na.

¹⁸Inijuanti motlalijque noca na quema ax nijpixqui fuerza, pero TOTECO nechtlalanqui.

¹⁹Nechquixti huan nechsehui campa ax mahuilili. Nechmanahui pampa nechicnelía.

²⁰TOTECO nechmacatoc tlen quinamiqui pampa nijchijtoc tlen xitlahuac. Nechtlaxtlahuijtoc pampa cuali noyolis.

²¹Nijtoquilijtoc iojhui TOTECO huan ax nimoiyocacajtoc tlen ya.

²²Niquilnamictoc nochi itlajtol huan ax quema nijcajtejtoc itlanahuatil.

²³Xitlahuac niitztoc iixpa. Nimoiyocatlalijtoc tlen nochi tlen fiero.

²⁴Huan TOTECO nechtlaxtlahuijtoc queja quinamiqui ica tlen cuali nijchijtoc, pampa quipantijtoc cuali noyolis iixpa.

²⁵TOTECO, tiquinicnelía huan tiitztoc temachtli ica tlen teicnelíaj huan tlen temachme. Tiitztoc cuali ica tlen quihuejcacahua tlajtlacoli.

²⁶Tiquintiochihua tlen tetiochihuaj, pero tetic timotlalía ica inijuanti tlen mosisiníaj.

²⁷Tiquinmaquixtía tlen moicnonequij, pero tiquinpinahualtía tlen mohueyimatij.

²⁸TOTECO, ta tlen tinoDios, ta tinechmaca tlahuili. Ta tijcueptoc nopa tzintlayohuilotl campa niitztoc ica tlahuili.

²⁹Ica mochicahualis, noTeco Dios, niquintehuis nocualancaitacahua, huan niquixcopanos nopa tepamitl tlen ica quitzactoque inialtepe.

³⁰Iojhui Toteco Dios nelía xitlahuac. Huan itlajtol tlen quitencahua, cuali para ipan timotemachise. TOTECO quinmanahuía nochi tlen ipan ya motemachíaj.

³¹Axaca seyoc Dios queja TOTECO. Axaca seyoc tlen huelis ipan timotemachise huan techmanahuis.

³²Toteco Dios nechmaca chicahualistli, huan nechchihuilía ma ninejnemi xitlahuac.

³³Yajaya nechfuerzajmaca para ma ax nihuetzi. Noicxihua mochihuaj temachtli queja iicxihua se chivo quema moquetzaj campa tlahuejcapa huan tlaxixitlaca.

³⁴Toteco Dios nechmachtía tlachque ma nijchihuas quema onca tlatehuijcayotl. Nechfuerzajmaca para cuali ma niquitzqui nopa tetic tepos huitoli tlen quichijtoque ica bronce.

³⁵Toteco Dios, ta tinechmanahuía huan tinechmaquixtía. Tinechitzquía ica monejmatl. Ica mohueyi teicnelijcayo tinechhueyichijtoc.

³⁶Tijchijtoc noojhui más patlahuac para ma ax nihuetzis.

³⁷Niquintepotztocac nocualancaitacahua huan niquinajsito. Huan ax nimocuepqui hasta quema niquintzontlamiltijtoya.

³⁸Niquinhuejhuelo huan ayoc quema motlalanase. Huetzque noicxitla.

³⁹Toteco Dios, ta tinechfuerzajmacac ipan nopa tlatehuijcayotl huan tijchijqui para nocualancaitacahua ma motlancuaquetzaquij noixtla.

⁴⁰Miyac moicancuepque para cholojtehuase huan queja nopa huelqui niquintzontlamilti.