SALMOS 18:17-32

¹⁷Nechmaquixti inimaco nocualancaitacahua cati quipiyayayaj miyac chicahualisti. Quena, nechmanahui ten nocualancaitacahua cati más quipiyayayaj chicahualisti que na.

¹⁸Inijuanti nechtanque ica na quema amo nijpixqui fuerza, pero TOTECO nechtananqui.

¹⁹Nechquixti huan nechsehui campa amo mahuilili. Nechmanahui pampa nechicnelía.

²⁰TOTECO nechmacatoc cati quinamiqui pampa nijchijtoc cati xitahuac. Nechtaxtahuijtoc pampa cuali nonemilis.

²¹Nijtoquilijtoc iojhui TOTECO huan amo nimoiyocacajtoc ten ya.

²²Niquelnamictoc nochi icamanal huan amo quema nijcajtejtoc itanahuatil.

²³Xitahuac niitztoc iixpa. Nimoiyocatalijtoc ten nochi cati fiero.

²⁴Huan TOTECO nechtaxtahuijtoc quej quinamiqui ica cati cuali nijchijtoc, pampa quiitztoc para cuali nonemilis iixpa.

²⁵TOTECO, tiquinicnelía huan tiitztoc temachti ica cati teicnelíaj huan cati temachme. Tiitztoc cuali ica cati quihuejcacahua tajtacoli.

²⁶Tiquintiochihua cati tetiochihuaj, pero timochihua titetic ica inijuanti cati mosisiníaj.

²⁷Tiquinmaquixtía cati moechcapanohuaj, pero tiquinpinahualtía cati mohueyimatij.

²⁸TOTECO, ta cati tinoDios, ta techmaca taahuili. Ta tijcuectoc nopa tzintayohuilot campa niitztoc ica taahuili.

²⁹Ica mochicahualis, noTeco Dios, niquintehuis nocualancaitacahua, huan nipanos iixco nopa tepamit cati ica quitzactoque inialtepe.

³⁰Iojhui Toteco Dios nelía xitahuac. Huan icamanal cati quitencahua, cuali para ipan timotemachise. TOTECO quinmanahuía nochi cati ipan ya motemachíaj.

³¹Amo cana aqui seyoc Dios quej TOTECO. Amo aqui seyoc cati huelis ipan timotemachise huan techmanahuis.

³²Toteco Dios nechmaca chicahualisti, huan nechchihualtía ma ninejnemi xitahuac.