Salmos 17:7-14

⁷Ble'e ca dxexache lázrele̱'u bénneache. Bselá benne' ca' dxuluxrén lazre̱' Lue' lu na' benne' dxeledábague̱' le̱'.

⁸Bxue neda' ca dxun benne' dxuxúe̱' xiaj lawe̱'. Gude̱zre neda' ca dxun bedxuj dxé̱zreba' zrí'ineba' zran xrílaba'

⁹chee̱ quebe bi xelún chia' benne' ca' dxelune̱' da cale̱la, benne' dxeledábague̱' neda', ne dxelaca lazre̱' xelútie̱' neda'.

¹⁰Quebe dxelexache lazre̱' le sa' ljwezre̱', na' dute̱ xel-la' dxulucá'ana szren cuine̱' dxuluchálaje̱'.

¹¹Gátete̱ze dxedá' dxeléchaje̱' neda'. Dxelaca lazre̱' xeline̱' neda' xu.

¹²Zaj naque̱' ca tu be̱zre xíxre'dau' dxaca lázreba' bi gáguba'. Zaj naque̱' ca tu be̱zre xixre', ba nucache cuínaba' chee̱ qué̱l-laba' béadu ca'.

¹³Gudá, Xran, gudábaga' benne' ca' dxelune̱' da cale̱la, na' bchiche̱' lu xu. Bselá neda' lu na' benne' ca' dxelune̱' da cale̱la, guchínenu' xia chiu'.

¹⁴Bselá neda' lu na' benne' ca' nen ni'a ná'quezu', Xran. Bselá neda' lu na' bénneache, benne' ca' zaj dxe'e̱ gunne xue chee̱ xe̱zr la xu nigaze, benne' ca' dxeláguqueze̱' da zácale̱'e̱ chiu'. Da nigáqueze dxulugawe̱' zrí'ine̱' ca', ne dxexegá'anaqueze da dxelágu zri'ine zre sue̱'.