SALMOS 16:1-11

¹Xinechmocuitlahui, Toteco Dios, pampa ipan ta nimotemachijtoc para tinechmanahuis.

²TOTECO, na nimitzilhuijtoc: “Ta tinoTeco huan axaca seyoc tlen huelis nechpalehuis.”

³Niquinicnelía inijuanti tlen mitzneltoquilíaj tlen itztoque ipan nopa tlali. Inijuanti tlen nelía yejyectzitzi ininyolo.

⁴Pero mojmostla más mocuesose tlacame tlen quintoquilíaj sequinoc inintlaixcopincayohua. Na ax quema nijtencahuasquía se tlacajcahualistli iniixtla inintotiotzitzi, niyon ax quema niquintocaxtisquía.

⁵San ta, TOTECO, nimitzpixtoc, tiitztoc nochi para na, yeca ayoc tleno nijtemos. Ta tinechmaca nochi tlen notechmonequi para niyoltos. Noyolis huan nochi tlen nijpixtoc eltoc momaco huan nijmati nelía temachtli.

⁶Nopa mecatl tlen ica tinechyejyecohuili campa nijselijtoc, huetzqui campa nelía cuali tlali. Nelía tlayejyectzi campa tinechmacatoc.

⁷Nimitzhueyichihuas, TOTECO, pampa tinechconsejomaca. Tlajco yohual tinechmaca motlalnamiquilis huan tinechnextilía ipan noyolo tlachque monequi nijchihuas.

⁸Nochipa nimoilhuía tlen ta, TOTECO, huan pampa tiitztoc nonechca, ax tleno nopantis.

⁹Yeca ipan noyolo nelía nijpiya paquilistli. Nochi notlacayo motemachijtoc ipan ta.

¹⁰Pampa ax tijcahuas notlacayo ipan tlacoyoctli, niyon ax tijcahuas ma palani itlacayo Yajaya Tlen Tlatzejtzeloltic.

¹¹Xinechnextilis catlía ojtli quipiya yolistli. Nijpiyas hueyi paquilistli nepa campa ta tiitztoc. Quena, oncas hueyi paquili para nochipa nepa campa monejmatl.