SALMOS 16:1-11

¹Bwia neda', Dios, dan' žx̱en ḻaža'a Le'.

²Ḻo yichj ḻáẕda'wa' žapa' Le', X̱ana' Dios: “Le' nako' X̱ana'. Bi be da' chawe' žata' chia' da' bi zan' ḻo no'o.”

³Žaz ḻáže'za' benne' ka' zej nake' che Dios ḻo yežlyó nga, na' ḻezka' benne' ka' zej nake' ḻi ḻaže'.

⁴Zan da' sáka'gak benne' ka' ẕka'n ẕéngake' lo'a ka'. Bi gona' ḻégake' tẕen kate' ẕḻáljgake' žen ḻáwgaken, na' bi wkonla' žin lágaken.

⁵X̱anžo Dios ẕwawe' neda' na' nake' da' chawe' chia'. Le', Dios, žape chi'o yeḻa' nban chia'.

⁶Da' žonno' chia' naken da' ba nez ẕen da' ẕzi'a, na' x̱tanḻe'e nak latje gan bzo' neda'.

⁷Wká'n ẕénteza' X̱anžo Dios, Bennen' žsedle' neda'. Kate' ne ẕtasa' ẕzejni'ile' neda' ḻo yichj ḻáẕda'wa'.

⁸Žx̱en ḻaža'a X̱anžo Dios yezi'e neda'. Dan' zoe' kwita', bi be gak wcheben neda'.

⁹Che ḻen zoa ḻáẕda'wa' yeḻa' žebél, na' žebéḻe'etezla', na' kate' gacha'a ḻo yežw ba wx̱én ḻaža'a Le'

¹⁰dan' bi wka'no' be' da' nakkza' ḻo latje choḻ chegak benne' gat ka', na' bi go'o latje nitla' dan' nakkza' chio' Le'.

¹¹Wḻoe'elo' neda' da' žaḻa' gona' nich gata' chia' yeḻa' nban. Gan zo' Le' yebéḻe'etezla', na' kwito' Le' sóateze yeḻa' ba nez ẕen chia'.