SALMOS 148:2-10

²Nochi amojuanti anitequihuajcahua, xijpaquilismacaca TOTECO. Quena, xijpaquilismacaca nochi amojuanti catli anquitequipanohuaj nepa ilhuicac.

³Ma quipaquilismacaca tonati huan metztli. Ma quipaquilismacaca nochi nopa sitlalime catli yejyectzi tlahuíaj.

⁴Ma quipaquilismacaca nopa ilhuicactli catli eltoc más huejcapa, huan nopa apoctli catli mopantía ajacatipa.

⁵Xijpaquilismacaca TOTECO pampa yaya camanaltic huan mochijqui catli ama onca.

⁶Yaya quinchijqui para eltose para nochipa, huan quichijqui se tlanahuatili catli ica amo quema moyolcuepas.

⁷Ma quipaquilismacaca TOTECO nochi catli itztoque ipan ni tlaltipactli. Ma quipaquilismacaca nopa huejhueyi tlapiyalme catli itztoque tlatzintla hueyi atl.

⁸Ma quipaquilismacaca nopa tlitl, tesihuitl, setl, apoctli, huan nopa ajacatl catli quichihuaj ipaquilis.

⁹Ma quipaquilismacaca nochi tepeme, tlachiquilme, huan nochi cuame catli temacaj inintlajca huan nochi tiocuame.

¹⁰Ma quipaquilismacaca TOTECO nochi tlamantli tlapiyalme, huan nochi tecuanime, cohuame, huan totome.