SALMOS 147:4-19

⁴Yajaya quimati quesqui imiyaca sitlalime onca huan sesen quintocatlalijtoc.

⁵Toteco nelía hueyi huan quipiya miyac chicahualistli. Itlalnamiquilis axaca hueli quitlamimachilía.

⁶TOTECO quinhueyitlalía tlen moicnonequij, pero nochi ax cuajcualme quinmajcahuas tlalchi.

⁷Xihuicaca para inquitlascamatise TOTECO. Xihuicaca ipampa nochi tlen quichijtoc toDios huan xitlatzotzonaca ica arpa.

⁸Toteco yajaya quitzacua elhuicactli ica mixtli. Yajaya tlaahuetziltía ipan tlaltepactli. Quichihua ma moscalti xihuitl ipan cuatitlamitl.

⁹Yajaya quintlamaca nopa tecuanime tlen nemij cuatitla. Ininpilconehua nopa cacalotl quintlamaca, quema pehuaj chocaj pampa mayanaj.

¹⁰Quema Toteco quiita se cahuayo tlen motlalohua chicahuac, o quema quiita se tlacatl tlen quipiya miyac fuerza, ax quipantía miyac paquilistli ipan ininchicahualis.

¹¹Pero TOTECO quipantía miyac paquilistli ipan tlacame tlen quitlepanitaj. Quipantía miyac paquilistli ipan tlen mochiyaj ipan ya iteicnelilis.

¹²Nochi imojuanti ipan ni altepetl Jerusalén, xijhueyimatica TOTECO. Quena, nochi tlen itztoque ipan tepetl Sion, xijpaquilismaca imoDios.

¹³Pampa yajaya cuali quitzactoc ipuertas imoaltepe para ax hueli quitlapos niyon se imocualancaitaca. Huan yajaya tlahuel quintiochijtoc imoconehua.

¹⁴Yajaya quititlanis tlasehuilistli ipan nochi imotlal, huan inmechmacas trigo tlen más cuali para ica ximopanoltica.

¹⁵Yajaya quintitlanis itlanahuatilhua ipan nochi tlaltepactli. Huan quema yajaya camatis, itlajtol nimantzi ajsis hasta campa hueli techaj.

¹⁶Yajaya quichihuas ma huetzi sitlal setl tlen chipahuac queja nextli. Huan quisemanas setl iixtla tlali campa hueli.

¹⁷¿Ajqueya hueli quiijiyohuis nopa tlasesecayotl?

¹⁸Pero teipa yajaya quinahuatis ma huala tlatotonilotl huan atiyas nopa setl. Quichihuas ma pehua tlaajacas huan nopa atl tlen mochijqui setl ipan atlajtli sampa motlalos.

¹⁹Yajaya quinmacac israelitame itlanahuatilhua, huan quinilhuijtoc nochi tlen cuali ma quichihuaca ipan inialtepe, para tetlajtolsencahuase xitlahuac.