Salmos 147:2-15

²Xránadxu Dios xexune̱' xe̱zre Jerusalén. Xequé̱'e̱ benne' Israel ca' zaj zue̱' xe̱zr la xu zitu' ca'.

³Dxexune̱' benne' ca' dxelexewí'ine lázrele̱'e̱, ne dxudé̱'e̱ ladxe' naga zaj naca we̱' chee̱ benne' ca'.

⁴¡Nézquezne̱' ca zaj naxán belaj ca'! ¡Tu tu belaj ca' dxu'e̱ la na!

⁵¡Szrente̱ naca Xránadxu Dios, ne nape̱' dute̱ xel-la' waca! ¡Quebe bi de̱ da quebe dxéajni'ine̱'!

⁶Xránadxu Dios dxácale̱ne̱' benne' dxexruj lazre' ca', na' dxuzéxruje̱' benne' ca' dxelune̱' da cale̱la.

⁷¡Le gul-la da güe lá'anale Xránadxu Dios! ¡Le gul-la, ne le quinne da cun zríadi'i na du lau Dios chee̱dxu!

⁸¡Le̱' dxudé̱'e̱ beuj ca' zran xabáa! ¡Le̱' dxesel-le̱' nisa xiuj lu xe̱zr la xu! ¡Le̱' dxune̱' dxelezría xíxre'du ca' lu xi'a ca'!

⁹¡Le̱' dxunézruje̱' da dxelagu be̱ xixre' ca'! ¡Dxunézruje̱' da dxelagu béchajdu ca', be̱ dxelebezre xa'aba'!

¹⁰Da dxezaca ba lázrele̱ne̱' quebe naca na xel-la' wal-la chee̱ bzrina' ca', ne quegá xel-la' wal-la chee̱ bénneache.

¹¹Dxezaca ba lázrele̱ne̱' benne' ca' dxelezrebe̱' Le̱', ne benne' ca' dxelebeza lazre̱' Le̱' chee̱ xexache lazre̱' le̱'.

¹²¡Le güe lá'ana Xránadxu Dios, le'e zrale xe̱zre Jerusalén! ¡Le güe lá'ana Dios chee̱le, le'e zrale xe̱zre Sión!

¹³¡Le̱' dxuzúa chúchue̱' dxa xu'u chee̱ xe̱zre chee̱le! ¡Dxune̱' dxaca chawe' chee̱ benne' ca' zaj zre̱'e̱ xe̱zre chee̱le!

¹⁴¡Dxebeque̱' xel-la' dxebeza zri lazre' lu xe̱zr la xu chee̱le! ¡Gúnnale̱'e̱ chee̱le zrua' chawe'!

¹⁵¡Dxusel-le̱' xrtizre̱' chee̱ benne' ca' zaj zre̱'e̱ dute̱ xe̱zr la xu, na' chadí dxaca ca da dxenné̱'!