SALMOS 146:2-9

²Nochi tonali ipan noyolis nijpaquilismacas TOTECO. Nihuicas tiohuicatl para noTeco Dios hasta nimiquis.

³Amo ximotemachica ipan huejhueyi tlacame tlen quipiyaj tequihuejcayotl, niyon ipan se tlen hueli tlacatl pampa niyon se tlacatl ax huelis mitzmaquixtis.

⁴Pampa se tonal miquise nochi tlacame huan mocuepase tlali. Quena, tlamis iniijiyo huan ininyolis, huan ica se tlalochtli tlamis nochi tlen moilhuijtoyaj quichihuase.

⁵Pero nelía paqui nopa tlacatl tlen quipixtoc queja itlapalehuijca yajaya tlen iTeco Jacob, huan san ipan TOTECO iDios motemachía para quimocuitlahuis.

⁶Yajaya tlen quichijchijqui elhuicactli, tlaltepactli, hueyi atl huan nochi tlen itztoque nopano. Yajaya tlen quichihua nochi tlen quitlajtolcajtoc para quichihuas.

⁷TOTECO quinchihuilía tlen xitlahuac nochi teicneltzitzi tlen sequinoc quintlaijiyohuiltíaj. Huan quintlamaca tlen mayanaj. Quinchihua ma yaca malacantoque tlen tzactoque yonque ax tleno quichijtoque.

⁸TOTECO quintlachiyaltía popoyotzitzi. Quintlalana tlen nechca itztoque para huetzise. Huan quinicnelía tlen monejnemiltíaj xitlahuac iixtla.

⁹TOTECO quinmocuitlahuía nopa sejcoyoc ehuani. Yajaya quinmocuitlahuía tlen icnotzitzi huan tlen cahual toahuihua. Pero yajaya quixolehua tlen quisencahuaj tlacame tlen ax quitlepanitaj.