SALMOS 145:5-20

⁵Na san nimoyolilhuis ten moyejyejca huan mohueyitilis, huan nopa tatanexti cati mitzyahualojtoc. Nimoilhuis ten nopa huejhueyi tiochicahualnescayot cati tijchijtoc.

⁶Masehualme camanaltise ten nopa huejhueyi tamanti cati tijchijtoc. Huan na nitepohuilis ten mohueyitilis.

⁷Nochi masehualme ipan taltipacti camanaltise para nelía ticuali huan hueyi moyolo. Quiijtose para tijchihua san cati xitahuac.

⁸TOTECO, hueyi moyolo huan tahuel titetasojta. Amo nimantzi ticualani huan titeicnelía miyac.

⁹TOTECO ta cuali moyolo ica nochi masehualme huan motaicnelijcayo monextía ipan sesen tamanti cati tijsencajtoc.

¹⁰TOTECO, nochi tojuanti cati ta techchijchijtoc timitztascamatij. Quena, nochi tojuanti cati timitztoquilíaj timitzpaquilismacase.

¹¹Tojuanti sentic timocamanalhuise ten ihueyitilis motanahuatilis campa ta titanahuatía, huan ticamanaltise quenicatza tijpiya hueyi chicahualisti.

¹²Titepohuilise ten nopa huejhueyi tiochicahualnescayot cati tijchijtoc, huan ten moyejyejca huan ten ihueyitilis motanahuatilis campa ta titanahuatía.

¹³Pampa motanahuatilis amo quema tamis. Ta tijpiyas tanahuatili ica nochi masehualme cati tacactiyase para nochipa.

¹⁴Ta TOTECO tiquintanana nochi cati huetzij, huan tiquinfuerzajmaca cati itztoque ipan tequipacholi.

¹⁵Nochi masehualme ipan taltipacti mitztemohuaj, huan mitzchiyaj para xiquinpalehui. Ta tiquinmaca inintacualis quej quinpolojtihuala.

¹⁶Ta ica momax tiquintiochihua nochi cati yoltoque, pampa tiquinmaca cati quicuase huan cati quiise.

¹⁷TOTECO quichihua san cati xitahuac, huan quinextía para hueyi iyolo ipan nochi cati quichihua.

¹⁸TOTECO itztoc ininechca nochi cati quitzajtzilíaj. Quena, itztoc ininechca nochi cati quitemohuaj ica nochi iniyolo.

¹⁹Yaya quinmaca cati quinequij nochi masehualme cati quiimacasij huan quitepanitaj. Quintacaquilía quema quitzajtzilíaj ma quinpalehui huan quinmaquixtía ten cati amo cuali.

²⁰TOTECO quinmocuitahuía nochi cati quiicnelíaj, pero nochi cati amo quitepanitaj, Toteco quintzontamiltis.