SALMOS 145:5-18

⁵Na san nimoyolilhuis tlen moyejyejca huan mohueyitilis, huan nopa tlatlanextli tlen mitzyahualohua. Nimoilhuis tlen nopa huejhueyi chicahualnescayotl tlen tijchijtoc.

⁶Tlacame camatise tlen nopa huejhueyi tlamantli tlen tijchijtoc. Huan na nitepohuilis tlen mohueyitilis.

⁷Nochi tlacame ipan tlaltepactli camatise para nelía ticuali huan hueyi moyolo. Quiijtose para tijchihua san tlen xitlahuac.

⁸TOTECO, hueyi moyolo huan tlahuel titetlasojtla. Ax nimantzi ticualani huan titeicnelía miyac.

⁹TOTECO ta cuali moyolo ica nochi tlacame huan moteicnelijcayo monextía ipan sesen tlamantli tlen tijsencajtoc.

¹⁰TOTECO, nochi tojuanti tlen ta titechchijchijtoc timitztlascamatij. Quena, nochi tojuanti tlen timitztoquilíaj timitzpaquilismacase.

¹¹Tojuanti san sejco timocamahuise tlen ihueyitilis motlanahuatilis campa ta titlanahuatía, huan ticamatise quejatza tijpiya hueyi chicahualistli.

¹²Titepohuilise tlen nopa huejhueyi chicahualnescayotl tlen tijchijtoc, huan tlen moyejyejca huan tlen ihueyitilis motlanahuatilis campa ta titlanahuatía.

¹³Pampa motlanahuatilis ax quema tlamis. Ta tijpiyas tlanahuatili ica nochi tlacame tlen tlacajtiyase para nochipa.

¹⁴Ta TOTECO tiquintlalana nochi tlen huetzij, huan tiquinfuerzajmaca tlen itztoque ipan cuesoli.

¹⁵Nochi tlacame ipan tlaltepactli mitztemohuaj, huan mitzchiyaj para xiquinpalehui. Ta tiquinmaca inintlacualis queja quinmonequilijtihuala.

¹⁶Ta ica moma tiquintiochihua nochi tlen yoltoque, pampa tiquinmaca tlen quicuase huan tlen quiise.

¹⁷TOTECO quichihua san tlen xitlahuac, huan quinextía para hueyi iyolo ipan nochi tlen quichihua.

¹⁸TOTECO itztoc ininnechca nochi tlen quinotzaj. Quena, itztoc ininnechca nochi tlen quitemohuaj ica nochi ininyolo.