SALMOS 145:1-17

¹Wká'n ẕena' Le', Dios chia'. Nako' Le' Benne' Wnná Bia' Ẕen chia'. Wká'n ẕénteza' La la'y chio' to chi'ize.

²Tža tža wká'n ẕena' Le'. Wká'n ẕénteza' La la'y chio' to chi'ize.

³Ẕente nak X̱anžo Dios, na' nak chie' we ḻáwtezežo Ḻe'. Batkle gak gónbia'žo ka ẕente nake'.

⁴Yógo'te kwe' benne' chio' ka' yéngekle' da' beno' Le' na' wzéngekle' yezika' benách ka nak da' ẕente na'.

⁵Wláb ḻaža'a ka nak yeḻa' ẕen che yeḻa' wak chio', na' ka nak da' ẕente ka' da' beno'.

⁶Yógo'te benne' ka' wcháljgake' ka nak yeḻa' wak che da' ẕente da' beno', na' neda' wzenla' ḻégake' ka nak yeḻa' ẕen chio'.

⁷Wzéngekle' ljéžgake' ka' ka nak yeḻa' ži'i ḻaže' ẕen chio', na' góḻtezegake' kan nako' Le' chawe'.

⁸X̱anžo Dios nake' ži'i ḻaže', na' žeyache' ḻáže'le' benne' chie' ka'. Nake' ẕen ḻaže', na' žeyache' ḻáže'ḻe'ele' žo'o.

⁹X̱anžo Dios žon chawe'e yógo'te benne' ka', na' žeyache' ḻáže'le' yógo'te da' zóagaken nbángaken, da' ka' bene' Ḻe'.

¹⁰Yógo'te da' ka' beno' wká'n ẕéngaken Le', X̱anto' Dios na' benne' chio' ka' we ḻáwgake' Le'.

¹¹Ẕcháḻjgake' ka ẕente nak yeḻa' wnná bia' chio'. Ẕcháḻjgake' ka nak yeḻa' wak ẕente chio'

¹²nich wzéngekle' yógo'te benne' ka' ka zej nak da' ẕente ka' da' beno', na' ka nak yeḻa' ẕen che yeḻa' wnná bia' chio'.

¹³Yeḻa' wnná bia' chion' sóatezen, na' nna bi'o yógo'te kwe' benách ka'.

¹⁴Nox̱w X̱anžo Dios yógo'te benne' ka' žejchégwgake'. Žechise' yógo'te benne' ka' zej ndo'e ḻo žin waḻe.

¹⁵Yógo'te benne' ka' ẕbézgake' Le' gákḻeno' ḻégake', na' Le' wneẕjo' da' gáwgake' kate' gaḻa' chen.

¹⁶Ḻo yeḻa' ži'i ḻaže' chio' ẕze no'o. Ẕneẕjo' da' žiážjegekle yógo'te da' zóagaken nbángaken.

¹⁷Chawe' nak X̱anžo Dios ḻo yógo'te da' žone', na' ḻi ḻaže' zej nak yógo'te da' žone' Ḻe'.