SALMOS 144:4-15

⁴Pampa toyolis san panotehua queja se ajacatl huan queja se ecahuilotl.

⁵TOTECO, xijcuelpacho nopa elhuicactli huan xitemo xinechpaxaloqui. Intla tiquinpanajsis nopa tepetini, popocase.

⁶Xijtitlani tlapetlanilotl queja elisquía cuatlamintli, huan xiquinsemana nochi mocualancaitacahua huan ax quimatise tlachque quichihuase.

⁷Hasta tlen nepa elhuicac xijxitlahua moma huan xinechmaquixti. Xinechchololti ininmaco ni nocualancaitacahua tlen sequinoc tlaltini ehuaj huan tlahuel quipiyaj chicahualistli. Na nijmati queja nimisahuisquía ipan se atl tlen tlahuel huejcatla.

⁸Inijuanti san quinpactía istlacatise. Tlatestigojquetzaj para quiijtose tlen melahuac, huan nimantzi istlacatij.

⁹NoTeco Dios, na nihuicas huicatl tlen yancuic, huan nitlatzotzonas ipan noarpa tlen quipiya majtlactli cuerdas.

¹⁰Pampa ta tlen tiquinchihua ma tlatlanica tlanahuatiani. Ta tlen tinechmaquixti na nimotlatequipanojca, David, para ma ax nechmictica ica machete.

¹¹Nojquiya xinechmaquixti huan xinechmanahui ininmaco nocualancaitacahua, pampa inijuanti san teistlacahuíaj huan tlacajcayahuaj.

¹²Xijchihua para totelpocahua ma elica tejtetique huan huejcapantique queja cuatini tlen yejyectzi moscaltíaj. Huan toichpocahua ma elica yejyectzitzi, queja nopa tlaquetzaltini tlen quinyejyecchijtoque, huan quinquetztoque ipan ininchajchaj tlanahuatiani.

¹³Xijchihua para tocoxtalhua ma temica ica miyac tlamantli pixquistli. Huan toborregojhua ma momiyaquilica hasta ma mochihuaca miles huan millones ipan topotrero.

¹⁴Xijchihua totorojhua ma quipiyaca miyac chicahualistli para tequitise. Amo xijcahuili niyon se tocualancaitaca ma quiyahualo nopa tepamitl tlen quiyahualohua toaltepe. San xitechmaca tlasehuilistli campa hueli. Amo xijcahuili para niyon se tlen totlacajhua monequi tetzajtzilis para tlapalehuili pampa quipanti tlen fiero ipan tocalles.

¹⁵Quena, nelía paquij nopa tlacame ipan se altepetl tlen quej ni eltoc, huan ax quipiya tlen fiero. Quena, nelía paquij cuali tlacame tlen quipiyaj TOTECO para ininDios, huan ipan ya motemachíaj.