SALMOS 140:6-10

⁶Na nimitzilhuijtoc, TOTECO, para ta tinoDios. Xinechtlacaquili quema nimitztzajtzilía.

⁷Ta tiTOTECO Dios, tinotemaquixtijca, ta tijpiya nochi chicahualistli para tinechmaquixtis. Ta tinechmocuitlahuía quema onca tlatehuijcayotl.

⁸TOTECO, amo xiquincahua ma tlatlanica nopa tlacame tlen ax mitztlepanitaj. Amo xiquinpalehui para ma quisa cuali tlen quinequij quichihuase para ma ax mohueyimatica.

⁹Xijchihua para nochi tlamantli tlen moilhuijtoque quichihuase ma huetzi ininpani. Ma motzontlamiltica senquistoc queja quisencajtoyaj nechtzontlamiltise na.

¹⁰Ipan inintzonteco ma huetzi tlicoli, o xiquinmajcahua ipan tlitl, o ipan tlacoyoctli tlen tlahuel huejcatla campa ayoc huelise quisase.