SALMOS 138:1-6

¹Ica nochi noyolo nimitztlascamatis, TOTECO, huan nihuicas para ta iniixtla nopa moelhuicac ejcahua.

²Nimotlancuaquetza iixmelac motiopa tlen tlatzejtzeloltic, huan nimitztlascamatis pampa nelía titetlasojtla huan titemachtli. Nochi tlen tinechtlajtolcahuilijtoc para tijchihuas, tijtlamichihuas pampa motlajtol nelía temachtli queja ta titemachtli.

³Quema nimitztzajtzilía, ta tinechnanquilía huan tinechfuerzajmaca.

⁴TOTECO, nochi tlanahuatiani tlen itztoque ipan ni tlaltepactli mitztlascamatise, pampa nochi inijuanti quicaquise tlen tijtlajtolcajtoc.

⁵Quena, huicase ipampa nochi nopa huejhueyi tlamantli tlen quichijtoc TOTECO, pampa ihueyitilis nelhueyi.

⁶Yonque TOTECO tlahuel hueyi, yajaya quintlacaquilía tlen moicnonequij. Pero tlen mohueyimatij, monequi moquetzase huejca tlen Toteco, pampa yajaya ax quinequi quinitas.