SALMOS 136:3-21

³Xijtlascamatica Toteco Dios catli ininTeco nochi tecojme, pampa itlaicnelijcayo amo quema tlami.

⁴Xijtlascamatica TOTECO pampa san ya hueli quichihua huejhueyi tlamantli, pampa itlaicnelijcayo amo quema tlami.

⁵Xijtlascamatica yaya catli quichijchijqui ilhuicactli ica miyac tlalnamiquilistli, pampa itlaicnelijcayo amo quema tlami.

⁶Xijtlascamatica yaya catli quitlali ni tlali ipani atl, pampa itlaicnelijcayo amo quema tlami.

⁷Xijtlascamatica yaya catli quinchijchijqui nopa tlahuilme catli onca nepa ilhuicac, pampa itlaicnelijcayo amo quema tlami.

⁸Quichijchijqui nopa tonati para ma tlahui tonaya, pampa itlaicnelijcayo amo quema tlami.

⁹Huan quichijchijqui metztli huan sitlalime para ma tlahuica tlayohua, pampa itlaicnelijcayo amo quema tlami.

¹⁰Xijtlascamatica TOTECO catli quintzontlamilti nopa achtihui ehuani tlen tlali Egipto, pampa itlaicnelijcayo amo quema tlami.

¹¹Xijtlascamatica catli quinquixti israelitame ipan inintlal nopa egiptome, pampa itlaicnelijcayo amo quema tlami.

¹²Quena, quinquixti ica ihueyi chicahualis huan ica inejmac quinpalehui, pampa itlaicnelijcayo amo quema tlami.

¹³Xijtlascamatica yaya catli quixelo nopa Hueyi Atl Chichiltic para ma panoca imasehualhua, pampa itlaicnelijcayo amo quema tlami.

¹⁴Huan quinpanolti nopa israelitame ipan tlali huactoc tlatlajco nopa hueyi atl, pampa itlaicnelijcayo amo quema tlami.

¹⁵Pero quinatzonpolihuilti Faraón huan isoldados ipan nopa hueyi atl, pampa itlaicnelijcayo amo quema tlami.

¹⁶Xijtlascamatica Toteco catli quinyacanqui imasehualhua ipan nopa huactoc tlali, pampa itlaicnelijcayo amo quema tlami.

¹⁷Xijtlascamatica yaya catli quinmanahui imasehualhua ininmaco tlanahuatiani catli quipixque miyac chicahualistli, pampa itlaicnelijcayo amo quema tlami.

¹⁸Yaya quintzontlamilti huejhueyi tlanahuatiani catli tlahuel quipiyayayaj chicahualistli, pampa itlaicnelijcayo amo quema tlami.

¹⁹Quitzontlamilti Sehón, inintlanahuatijca nopa amorreos, pampa itlaicnelijcayo amo quema tlami.

²⁰Nojquiya quimicti Og, tlanahuatijquetl tlen tlali Basán, pampa itlaicnelijcayo amo quema tlami.

²¹Huan inintlal nopa tlanahuatiani, Toteco quinmacac imasehualhua quen se tlamantli catli inintata quincahuilijtejqui, pampa itlaicnelijcayo amo quema tlami.