SALMOS 136:2-22

²Xijtlascamatica Toteco Dios tlen más hueyi tlen nochi sequinoc “tiotzitzi”, pampa iteicnelijcayo ax quema tlami.

³Xijtlascamatica Toteco Dios tlen ininTeco nochi tecojme, pampa iteicnelijcayo ax quema tlami.

⁴Xijtlascamatica TOTECO pampa san ya hueli quichihua huejhueyi tlamantli, pampa iteicnelijcayo ax quema tlami.

⁵Xijtlascamatica yajaya tlen quichijchijqui elhuicactli ica miyac tlalnamiquistli, pampa iteicnelijcayo ax quema tlami.

⁶Xijtlascamatica yajaya tlen quitlali ni tlali ipani atl, pampa iteicnelijcayo ax quema tlami.

⁷Xijtlascamatica yajaya tlen quinchijchijqui nopa tlahuili tlen onca nepa elhuicac, pampa iteicnelijcayo ax quema tlami.

⁸Quichijchijqui nopa tonati para ma tlahui tonaya, pampa iteicnelijcayo ax quema tlami.

⁹Huan quichijchijqui metztli huan sitlalime para ma tlahuica tlayohua, pampa iteicnelijcayo ax quema tlami.

¹⁰Xijtlascamatica TOTECO tlen quintzontlamilti nopa achtohui ehuani tlen tlali Egipto, pampa iteicnelijcayo ax quema tlami.

¹¹Xijtlascamatica tlen quinquixti israelitame ipan inintlal nopa egiptome, pampa iteicnelijcayo ax quema tlami.

¹²Quena, quinquixti ica ihueyi chicahualis huan ica inejmatl quinpalehui, pampa iteicnelijcayo ax quema tlami.

¹³Xijtlascamatica yajaya tlen quixelo nopa Hueyi Atl Chichiltic para ma panoca itlacajhua, pampa iteicnelijcayo ax quema tlami.

¹⁴Huan quinpanolti nopa israelitame ipan tlali huactoc tlatlajco nopa hueyi atl, pampa iteicnelijcayo ax quema tlami.

¹⁵Pero quinatzonpolihuilti Faraón huan isoldados ipan nopa hueyi atl, pampa iteicnelijcayo ax quema tlami.

¹⁶Xijtlascamatica Toteco tlen quinyacanqui itlacajhua ipan nopa huactoc tlali, pampa iteicnelijcayo ax quema tlami.

¹⁷Xijtlascamatica yajaya tlen quinmanahui itlacajhua ininmaco tlanahuatiani tlen quipixque miyac chicahualistli, pampa iteicnelijcayo ax quema tlami.

¹⁸Yajaya quintzontlamilti huejhueyi tlanahuatiani tlen tlahuel quipiyayayaj chicahualistli, pampa iteicnelijcayo ax quema tlami.

¹⁹Quitzontlamilti Sehón, inintlanahuatijca nopa amorreos, pampa iteicnelijcayo ax quema tlami.

²⁰Nojquiya quimicti Og, tlanahuatijquetl tlen tlali Basán, pampa iteicnelijcayo ax quema tlami.

²¹Huan inintlal nopa tlanahuatiani, Toteco quinmacac itlacajhua queja se tlamantli tlen inintata quincahuilijtejqui, pampa iteicnelijcayo ax quema tlami.

²²Quena, quimacac itlatequipanojca Israel para ma moaxcati nopa tlali para nochipa, pampa iteicnelijcayo ax quema tlami.