SALMOS 136:16-25

¹⁶Xijtlascamatica Toteco catli quinyacanqui imasehualhua ipan nopa huactoc tlali, pampa itlaicnelijcayo amo quema tlami.

¹⁷Xijtlascamatica yaya catli quinmanahui imasehualhua ininmaco tlanahuatiani catli quipixque miyac chicahualistli, pampa itlaicnelijcayo amo quema tlami.

¹⁸Yaya quintzontlamilti huejhueyi tlanahuatiani catli tlahuel quipiyayayaj chicahualistli, pampa itlaicnelijcayo amo quema tlami.

¹⁹Quitzontlamilti Sehón, inintlanahuatijca nopa amorreos, pampa itlaicnelijcayo amo quema tlami.

²⁰Nojquiya quimicti Og, tlanahuatijquetl tlen tlali Basán, pampa itlaicnelijcayo amo quema tlami.

²¹Huan inintlal nopa tlanahuatiani, Toteco quinmacac imasehualhua quen se tlamantli catli inintata quincahuilijtejqui, pampa itlaicnelijcayo amo quema tlami.

²²Quena, quimacac itequipanojca Israel para ma moaxcati nopa tlali para nochipa, pampa itlaicnelijcayo amo quema tlami.

²³Yaya catli techelnamijqui tiisraelitame quema ayacmo tijpiyayayaj chicahualistli, pampa itlaicnelijcayo amo quema tlami.

²⁴Yaya techmanahui ininmaco tocualancaitacahua, pampa itlaicnelijcayo amo quema tlami.

²⁵Yaya quinmaca tlacualistli nochi tlamantli catli yoltoque, pampa itlaicnelijcayo amo quema tlami.