SALMOS 135:7-20

⁷Quichihua para ipan nochi tlaltipactli ma motlanana mixtli, huan nojquiya quititlani tlapetlanilotl huan quichihua ma tlaquiyahui. Yaya quinahuatía ma quisa nopa ajacatl campa moajoctoc.

⁸Quichijqui ma miqui nopa achtihui ejquetl ipan sesen familia tlen tlali Egipto, huan nopa achtihui ejquetl tlen inintlapiyalhua.

⁹Quichijqui huejhueyi tiochicahual nextili ipan tlali Egipto iixpa Faraón huan itequipanojcahua.

¹⁰Quintzontlamilti miyac masehualme ipan miyac tlalme. Quinmicti tlanahuatiani catli quipiyayayaj miyac chicahualistli.

¹¹Quimicti Sehón catli eliyaya inintlanahuatijca nopa amorreos. Nojquiya quimicti Og tlanahuatijquetl tlen tlali Basán huan nochi nopa tlanahuatiani ipan tlali Canaán.

¹²Huan nochi nopa tlali catli quinahuatiyayaj nopa tlanahuatiani quincuili, huan quinmacac nopa tlalme nopa israelitame quen elisquía se tlamantli catli inintata quincahuilijtejqui.

¹³TOTECO, masehualme mitzelnamictose para nochipa. Nochi masehualme catli tlacajtiyase mitziximajtose para tlahuel tihueyi.

¹⁴Pampa TOTECO quintlajtolsencahuas xitlahuac nochi imasehualhua, huan yaya quintlasojtlas itequipanojcahua.

¹⁵Nopa masehualme catli itztoque ipan tlalme catli amo quiiximatij Toteco, quinhueyichihuaj teteyome tlen oro huan plata catli quinchijchijtoque ica ininmax.

¹⁶Nopa teteyome quipiyaj inincamac, pero amo camanaltij, quipiyaj iniixteyol, pero amo tlachiyaj.

¹⁷Quipiyaj ininnacas, pero amo tlacaquij, huan nojquiya amo hueli tlaijiyotilanaj.

¹⁸Nopa masehualme catli quinchijchihuaj nopa teteyome nelía huihuitique, san se quen nopa teteyome, huan san se huihuitique catli ininpan motemachíaj.

¹⁹¡Anisraelitame, xijpaquilismacaca, TOTECO! Amojuanti antotajtzitzi catli aniixhuihua Aarón, xijpaquilismacaca TOTECO.

²⁰Aniixhuihua Leví, xijpaquilismacaca TOTECO. Huan nochi amojuanti catli anquiimacasij huan anquitlepanitaj TOTECO, xijpaquilismacaca.