Salmos 135:12-21

¹²Paycunapa chacrantami partisyunta goycuran acrashan Israel runacunata.

¹³Tayta Dios, gamga imaycamapis cawaycanquimi. Tayta Dios, gamtaga imaycamapis yarparäshunquipämi.

¹⁴Tayta Diosga acrashan runacunata jusgangami. Tayta Diosga sirbejnincunata cuyapangami.

¹⁵Tayta Diosta mana rispitajcunapa ïduluncunaga goripita, guellaypitami. Chaycunaga runacuna rurashallanmi.

¹⁶Shimin captinpis manami rimanchu. Ñawin captinpis manami ricanchu.

¹⁷Rinrin captinpis manami wiyanchu. Chaycunapaga manami jämayninpis canchu.

¹⁸Chay ïdulucunanömi caycan chay ïdulucunata rurajcunapis. Chay ïdulucunanömi caycan chay ïdulucunaman yäracojcunapis.

¹⁹Israelcuna, Tayta Diosta alabay-llapa. Cüracuna, Tayta Diosta alabay-llapa.

²⁰Leví famillyacuna, Tayta Diosta alabay-llapa. Tayta Diosta rispitajcuna payta alabay-llapa.

²¹¡Jerusalencho tiyaj Tayta Diosga alabasha cachun! ¡Aleluya! ¡Tayta Diosga alabasha cachun!