Salmos 135:1-16

¹¡Le güe lá'ana La Xránadxu Dios! ¡Le güe lá'ana Le̱', le'e, we̱n zrin chee̱ Xránadxu,

²le'e zrale xu'u lizre Xránadxu Dios, lu chale'aj chee̱ xu'u naga zúaqueze Dios!

³¡Le güe lá'ana Xránadxu lawe' da naque̱' xrlátaje! ¡Le gul-la da güe lá'anale La Le̱', lawe' da naque̱' zri'i lazre'!

⁴Xránadxu Dios ba guqué̱'e̱ zri'ine zre sua Jacob. Guqué̱'e̱ zri'ine zre sua Israel chee̱ xelaque̱' bénneache chee̱'.

⁵Nézquezdxu szrente̱ naca Xránadxu Dios. Xránadxu naque̱' szrendxa ca xúgute̱ dios chee̱ benne' zitu' ca'.

⁶Xúgute̱ da dxaca lazre' Xránadxu gune̱', dxune̱' na zran xabáa, ne lu xe̱zr la xu, ne lu nísadau', ne lu da situj chee̱ nísadau' ca'.

⁷Dxune̱' zá'aca beuj dapa saca chee̱ xe̱zr la xu. Dxune̱' dxelepe xesa guziu' gate dxaca xiuj. Dxune̱' dxaca be' gátete̱ze.

⁸Be̱ne̱' gulate bi biu nedxu chee̱ benne' Egipto ca'. Gulate bi biu nedxu chee̱ bénneache, ne béadu ca' chee̱ be̱ xixre' chee̱' ca'.

⁹Be̱ne̱' xel-la' waca ca' da za xabáa, ne da zrente̱ ca' da be̱ne̱' lu xe̱zr la xu chee̱ benne' Egipto ca', da ca' be̱n Dios da guca chee̱ Faraón, ne chee̱ xúgute̱ we̱n zrin chee̱ Faraón na'.

¹⁰Bzria xi'e̱ bénneache zánete̱ cue' xe̱zr la xu ca', ne be̱tie̱' benne' wenná bea ca', benne' zaj nápale̱'e̱ xel-la' dxelenná bea.

¹¹Be̱tie̱' Sehón, wenná bea chee̱ benne' amorreo ca', ne Og, wenná bea chee̱ benne' Basán ca', ne xúgute̱ benne' wenná bea chee̱ benne' Canaán ca'.

¹²Bequé̱'e̱ xe̱zr la xu nigá lu na' benne' wenná bea ca', na' bnézruje̱' na lu na' bénneache chee̱', benne' Israel ca'.

¹³Xrana' Dios, chadía chacanna zua lau' Lue'. Tu cheajlesá lázrezqueze bénneache Lue'.

¹⁴Xránadxu Dios guchi'e̱ chee̱ bénneache chee̱', ne xexache lazre̱' chee̱dxu dxi'u, we̱n zrin chee̱'.

¹⁵Bedau' xia xaga ca' chee̱ benne' xe̱zr la xu ca' zaj naca na oro, ne plata. Zaj naca na da belún bénneache.

¹⁶Zaj zua dxu'a na san quebe dxelenné̱ na. Zaj zua lau na san quebe dxelelé'e na.