SALMOS 135:1-16

¹¡Xijpaquilismacaca TOTECO! Quena, xijpaquilismacaca nochi amojuanti anitequipanojcahua.

²Xijpaquilismacaca nochi amojuanti cati anitztoque ipan ichaj TOTECO huan cati annentinemij icalixpa.

³Xijpaquilismacaca TOTECO pampa yaya nelía cuali. Xijhuicatica ica tiohuicat pampa yaya hueyi iyolo.

⁴Pampa TOTECO quitapejpenijtoc Jacob para quiicnelis. Quintapejpeni nochi iixhuihua ma elica iaxcahua.

⁵Na nijmati para TOTECO tahuel hueyi. Nijmati para yaya tahuel más hueyi que nochi cati quintocaxtíaj “dioses”.

⁶TOTECO quichihua nochi cati quinequi quichihuas ipan ilhuicacti, taltipacti, huan ipan hueyi at huan campa más huejcata.

⁷Quichihua para ipan nochi taltipacti ma motanana mixti, huan nojquiya quititani tapetanilot huan quichihua ma huetzi at. Yaya quinahuatía ma quisa nopa ajacat campa moajoctoc.

⁸Quichijqui ma miqui nopa achtohui ejquet ipan sese familia ten tali Egipto, huan nopa achtohui ejquet ten inintapiyalhua.

⁹Quichijqui huejhueyi tiochicahualnescayot ipan tali Egipto iixpa Faraón huan itequipanojcahua.

¹⁰Quintzontamilti miyac masehualme ipan miyac talme. Quinmicti tanahuatiani cati quipiyayayaj miyac chicahualisti.

¹¹Quimicti Sehón cati eliyaya inintanahuatijca nopa amorreos. Nojquiya quimicti Og tanahuatijquet ten tali Basán huan nochi nopa tanahuatiani ipan tali Canaán.

¹²Huan nochi nopa tali cati quinahuatiyayaj nopa tanahuatiani quincuili, huan quinmacac nopa talme nopa israelitame quej elisquía se tamanti cati inintata quincahuilijtejqui.

¹³TOTECO, masehualme mitzelnamictose para nochipa. Nochi masehualme cati tacactiyase mitzixmajtose para tahuel tihueyi.

¹⁴Pampa TOTECO quintajtolsencahuas xitahuac nochi imasehualhua, huan yaya quintasojtas itequipanojcahua.

¹⁵Nopa masehualme cati itztoque ipan talme cati amo quiixmatij Toteco, quinhueyichihuaj teteyome ten oro huan plata cati quinchijchijtoque ica inimax.

¹⁶Nopa teteyome quipiyaj inincamac, pero amo camanaltij, quipiyaj iniixteyol, pero amo tachiyaj.