Salmos 132:2-15

²Jacobpa munayniyoj Tayta Diosnin yarpaycuy ari David aunishushayquitaga.

³Pay niran: «Wasëchöpis manami tiyashächu. Puñuytapis manami tarishächu.

⁴Manami ichicllatapis puñuycushächu

⁵Tayta Diospaj juc pachata manaraj tarishäyäga, Jacobpa munayniyoj Diosnin tiyananpaj manaraj tarishäyäga.»

⁶Efrata particho conträtu babul caycashanpaj parlajtami wiyaranchi. Y Jaar partichönami tariranchi.

⁷Tayta Diospa Wasinman aywashun-llapa. Paypa ñaupanman gongurpacushun-llapa.

⁸Tayta Dios shamuyna. Tiyanayqui pachaman shamuy ari. Conträtu babulniquiwan shamuy ari.

⁹Cüracunaga allillatana rurachun. Wiyacushojcunana cushicuypita gaparpächun.

¹⁰Mandananpaj churashayqui raytaga sirbishojniqui David-raycu ama gongaycuychu ari.

¹¹Tayta Diosmi Davidta auniran. Aunishantaga manami cutiricongachu. Aunir niran: «Gampita mirar aywajllami ruquiqui ray canga.

¹²Parlacushanchïta wamrayquicuna cumliptenga yachachinäpaj caycaj laycunata cumliptenga paycunapa wamrancunapis rucar rucarmi imaycamapis ray caycanga.»

¹³Tayta Diosmi acrasha Sión lömataga. Chaycho tiyananpämi acrasha.

¹⁴Tayta Diosmi niran: «Cay jircachömi imaypis caycäshaj. Caychömi tiyashaj. Cay partimi noga tiyanäpäga alli casha.

¹⁵Caycho carmi micuynincunamanpis bindisyunta churashaj. Pishipacoj pobricunatapis micuyta tarichishaj.