SALMOS 119:37-64

³⁷Techhuejcatali ten nochi tamanti cati amo cuali para amo niquixtocas. Más cuali talojtzitzi techyolchicahua para senquisa ninemis ipan moojhui.

³⁸Techmatilti na, nimotequipanojca, para temachti techmacas cati techtajtolcahuilijtoc, pampa san ta nimitzimacasi huan nimitztepanita.

³⁹Amo techcahuili ma niquinimacasi cati nechpinahualtíaj pampa nimitztepanita, pampa motamachtil senquisa cuali huan xitahuac.

⁴⁰TOTECO, na tahuel nijnequi nijchihuas cati quiijtohuaj motanahuatilhua. Xijyancuili nonemilis pampa ta senquisa tixitahuac.

⁴¹TOTECO, techtasojta huan techmaquixti ten nocualancaitacahua, san quej tiquijtojtoc tijchihuas.

⁴²Quej nopa huelis niquinnanquilis inijuanti cati nechpinahualtíaj, huan niquinmachiltis para san nimotemachía ipan mocamanal.

⁴³Amo techquixtili mocamanal cati melahuac huan amo techcahuili ma niquelcahua, pampa san ipan motamachtil na nimotemachía.

⁴⁴Na nijtepanitas moley mojmosta. Quena, para nochipa nijtepanitas moley huan amo quema tamis.

⁴⁵Ninemis nimajcajtoc pampa niquintemohua motanahuatilhua para nijchihuas cati quiijtohuaj.

⁴⁶Na niquinpohuilis motajtol tanahuatiani, huan amo nipinahuas.

⁴⁷Na nimopaquilismacas ipan motanahuatilhua pampa tahuel niquinicnelía.

⁴⁸Nimomatananas para nijnextis notatepanitacayo por motanahuatilhua, huan san nimoyolilhuijtinemis ten nochi cati techyolmelajtoc ma tijchihuaca ipan tonemilis.

⁴⁹Amo quema xiquelcahua cati techtajtolcahuilijtoc techchihuilis na, nimotequipanojca, pampa san ya nopa nijchixtoc.

⁵⁰Cati techtencahuilijtoc techchihuilis nechyoltalía quema nimopantía ipan taijyohuilisti. Quena, nochi cati tiquijtojtoc nechmaca yancuic chicahualisti ipan nonemilis.

⁵¹Nopa masehualme cati mohueyimatij nechpinajtíaj pampa nimitztepanita, Toteco, pero masque ya nopa, na amo nimohuejcatalis ten moley.

⁵²TOTECO, na niquelnamiqui motamachtil cati huejcajquiya techmacac. Huan motamachtil nochipa nechyoltalía.

⁵³Nelía tahuel nicualani ica nopa taixpanoca masehualme cati quitahuelcahuaj moley.

⁵⁴Nochi cati techyolmelajtoc nechhualiquilijtoc paquilisti, huan nechchijtoc ma nihuica campa hueli campa niitztinentoc quej niseyoc tali ejquet.

⁵⁵Ica tayohua nimitzelnamiqui, TOTECO, huan nijnequi nijchihuas cati quiijtohua moley.

⁵⁶Nijseli tahuel miyac tatiochihualisti pampa nijchijqui cati quiijtohuaj motanahuatilhua.

⁵⁷¡TOTECO, san ta tinoaxca! Na niquijtojtoc para nijtepanitas cati quiijtohua mocamanal.

⁵⁸Ica nochi noyolo nijnequi motatiochihualis. Techtasojta senquisa quej techtajtolcahuilijtoc para tijchihuas.

⁵⁹Nimotachili quenicatza nimonejnemiltiyaya huan nimantzi nimocuetqui para nijchihuas cati quiijtohua motajtol.

⁶⁰Quena, nimoisihuiltía para nijchihuas cati quiijtohuaj motanahuatilhua.

⁶¹Miyac taixpanoca masehualme nechyahualojtoque para ma nitajtacolchihua inihuaya, pero na amo niquelcajtoc moley.

⁶²Tajco yohual nimijquehua para nimitztascamatis por motamachtil cati senquisa xitahuac.

⁶³Na niquinita quej nohuampoyohua nochi cati mitzimacasij huan mitztepanitaj, huan nochi cati quichihuaj cati quiijtohuaj motanahuatilhua.

⁶⁴¡TOTECO, nochi taltipacti temitoc ica motaicnelijcayo! Technextili nochi cati techyolmelajtoc ma nijchihua ipan nonemilis.