Salmo 9:4-20

⁴Tan din iyat mo ay mangokom yan kosto, inkeddeng mo ay magay basol ko.

⁵Dinosam din ipogaw sin kailiili ay mangam-amag si lawa, pinonas mo et malinglingan das eng-enggana.

⁶Din kalaban mi, namingpingsan ay naabak da. Binakas mo din siyodad da, et malinglingan das eng-enggana.

⁷Ngem sik-a pay ay Diyos, magay pap-eng di panturayam. Insaad mo din tronom ay pangokomam.

⁸Am-in ay ipogaw isnan labaw di daga, Nalinteg ya kosto di iyat mo en daida.

⁹Din ipogaw ay paligaten di iib-a da, sik-a ay Diyos di pankamangan da sin timpon di ligat da.

¹⁰Talken daka sin nangammo en sik-a, tan adi kan baybay-an din mankamang en sik-a.

¹¹Mankanta kayo ay mangidaydayaw en Diyos ay manturay ed Zion. Dad-aten yo din inamag na sin am-in ay nasyon.

¹²Adi linglingan Diyos din mapalpaligat ya din adawag da, et dosaena din mamalpaligat en daida.

¹³Maseg-ang ka ay Apo, ilaem nan pomalpaligatan di kaibaw ko. Sin pese omisalakan ka koma,

¹⁴ta sin sangoanan di ipogaw ed Jerusalem, idaydayaw kos sik-a ya manragsakak tan inmisalakan ka.

¹⁵Din nanasyon yan nankaot da si bito ay nag-asan da yan siya met laeng di naknaan da.

¹⁶Inpaammom mo sino ka ay Apo babaen sin nalinteg ay panangokom mo. Ngem din mangam-amag si lawa, kaman tagdey ay mangna en daida din mismo ay am-amagen da.

¹⁷Pese di pantongpalan di mangam-amag si lawa. Katet-ewa na, am-in ay nanigaan en Diyos et say pantongpalan da.

¹⁸Ngem din kakkaasi, baken kanayon ay mabaybay-an da, adi aben makaan din namnama da.

¹⁹Apo, man-gonay ka koma, adi ka ipalobos ay makalisi di ipogaw en sik-a. Sinopem din nanasyon ta okomem daida.

²⁰Apo, kibtotem man daida ta ammoen da ay owat dan ipogaw tet-ewa.