Salmo 9:2-18

²Too mlaan i nawagu na lehew agu ge; mlingag agu dmayen ge, Dwata Too Mdatah.

³Dad dmuen deg, gal ale mila di kitela ge msen di deg, na fugen ale na fles mati di kanfem;

⁴hae, du tansenam i nimògu du matlu di kitem; na tasudeng ge di gusudengam mukum na matlu i kukumam.

⁵Tanukumam i dad to là faglut di ge; na tafalmom i dad to mimò sasè; balù i dagitla taflanam di fandam dad to kel di landè sen;

⁶i dad to dmuen deg di muna, talandè nan, na balù i dad malbang syudadla tafalmom; talandè nan gufaldam dale kel di landè sen.

⁷Kabay i Amugu Dwata, landè gusen i kagotan; tasudeng kenen di gusudengan mukum.

⁸Na du too matlu i kukuman, nukuman i kdee to di landè nsenan na fagu alò di kaglut.

⁹I Amugu Dwata i gumila dad to mabkut, na di bang i samuk, kenen guflidungla.

¹⁰Amugu Dwata, i dad to dmilè ge, smalig ale di ge, du laam sa fbayà i dad to fdadong di ge.

¹¹Mlingag ito dmayen i Amuito Dwata, i mnè di banwen Sion; na tnulenito i dad to di klamang banwe gablà di dad mgimoan.

¹²Fanlayam Dwata i dad to manò, na fandaman i dad to fanlayamla, na laan fbayà i katlola kenen.

¹³Taman begam agu kando, Amugu Dwata, na fandamam i kagkahgu, du fanlayam agu i dad to mnang nawa deg. Ge i falwà deg di fati,

¹⁴taman falwaam agu du fye gtulengu di kdee tom ditù di syudadam Sion, i kdee kafyem di deg; na too agu lehew di kafalwaam deg.

¹⁵I dad to là faglut di Dwata, salngad ale di dad to mtatek di mngalam sol nakolla du guftatekla i dad demela to; gambet mawel ale bay baling dale magfawel, du dale gumulê i kafsasèla i dad demela to.

¹⁶Gadeito i katlu Dwata fagu di kukuman dad to, bay gakfè i dad to sasè fagu di dale sasè nimò.

¹⁷Na én gukella di gumlayam dale, na balù fa i dad to là mayè faldam Dwata.

¹⁸Kabay dad to nun klidùla là mnè di klidùla kel di atuan; na i fanden i dad to landè, là tì lana kel di landè sen du gafaldam ale Dwata.