Salmo 97:2-11

²Nekeliǥuy kandin is mekepal he ǥapun, ne egkezumahan te ketazeng wey hustu he kukuman is kedhadì din.

³Duen hapuy ziyà te egkehunaan din ne iyan haazà ebpekeepur te menge kuntada zin diyà te peliǥuy.

⁴Is kilat din neketayew te kelibutan. Ne hein naahà heini te menge etew ne mibpengerker sikandan te kegkahandek.

⁵Nengetunew is menge vuvungan he henduen be te kendilà diyà te etuvangan te Nengazen, is Nengazen iyan ebayàbayà te tivuuk he kelibutan.

⁶Impahayag te langit he metazeng sikandin, ne naahà te langun he menge etew is kegkemekeǥeǥehem din.

⁷Egkepeel-elezan is langun he edsimba te ledawan wey is ibpegalbu zan is duma he menge ed-ezapen. Is langun he tarù he megbevayà edluhud te ked-azap te tutuu he Megbevayà.

⁸Nengazen, nezineg te menge meǥinged te Jerusalem wey te zuma pa he menge inged diyà te Juda he edsilutan nu is menge kuntada zan, umbe nengelipey sikandan.

⁹Iyan ka, Nengazen, Utew Lavew he Megbevayà, he ebayàbayà kayi te tivuuk he kelibutan. Utew ka lavew te langun he mid-isip te menge etew he menge megbevayè dan.

¹⁰Is menge etew he mibmahal zan is Nengazen ne kinahanglan he igkeepes dan is mezaat. Su edtipiǥan te Nengazen is untung te metinumanen he menge etew zin. Ne kenà ebpekezezaat kandan is menge lalung su edlibriyen din sikandan.

¹¹Is keupiya te Megbevayà ne iring te andew he edsilà diyà te menge metazeng ne ebpekeveǥey heini te kelipey kandan.