Salmo 96:6-13

⁶Madaydayaw sisya, mabigbig di kinangato na. Din panakabalina ya mankoniniing ay kinadiyos na et pon-en da din Timplo na.

⁷Dayawen yo si Diyos, amin ay nasyon isnan daga, bigbigen yo din panakabalin ya kinadiyos na

⁸ya din madaydayaw ay ngadana. Iey yon daton yon sisya ya senggep kayo sin Timplo na.

⁹Mandokmog kayo ay mandayaw en sisya ay maptemapteng din kinasanto na. Manpayegpeg kayo si egyat yo sin sangoanana, amin ay ipogaw isnan daga.

¹⁰Amin ay nasyon di pangibagaan yo ay enggay man-ari si Diyos Apo. Insaad na ay kosto din daga et adi maikiwkiweg. Din pangokomana sin kaipoipogaw yan nalinteg.

¹¹Manragsak kayo ay wadad daya ya isnan daga, manragsak kayo ay baybay ya amin ay linaona,

¹²dakayo abe ay papayew ya amin ay molmola, ibogaw yo din ragsak yo, kakaiw sin kada.

¹³Manragsak kayo sin omalian Diyos ay mangituray sin daga. Magay pabpaborana ya nalinteg di iyat na ay mangokom ya mangituray sin ipogaw isnan daga.