Salmo 90:8-17

⁸Neehè nu is menge salè dey. Minsan is meeles is kebeeli zey zuen ne nepurung nu heini maahà.

⁹Ibpatey zey is pauk nu kenami; ne henduen dà te naasnaas is kegketapus te untung dey.

¹⁰Is keluǥayad te untung dey ne 70 dà he tuig, etawa 80 he tuig emun melig-en is kedlelawa zey. Piru minsan pa is kineupiyahan he menge tuig te ked-ubpè dey, ne mahabet gihapun he menge keseengan wey menge kelised is egkengeseǥazan dey. Tutuu iyan he meǥaan dà egketapus is untung dey ne egkahanew key en.

¹¹Wazè pa nekesaǥad te ipiktu te zekelà he pauk nu. Ne zutun te ked-iseg te keuluwanen dey te pauk nu, ne ed-iseg daan is kedtahud dey kenikew.

¹²Ipeisip-isip nu kenami he mevavè dà is untung dey, su para mebmetau key kayi te kebpengungubpaan dey.

¹³Nengazen, sengemenu keluǥayad is kegkepeuki nu kenami? Seǥipaa key en wey kehizuwi key en is menge suluǥuen nu.

¹⁴Kada meselem ipetuusi nu kenami is kebmahala nu kenami su para mekekanta key te kedlipey, ne ebmelipayen key te tivuuk he untung dey.

¹⁵Beǥayi key kenikew te kelipey he iring keluǥayad te menge tuig te kedsiluti nu wey kebpeentusa nu kenami.

¹⁶Ipeehè nu kenami te menge suluǥuen nu wey te menge kevuwazan dey, is egkein-inuwan he vaal nu wey is kegkemekeǥeǥehem nu.

¹⁷Nengazen he Megbevayè dey, berakat he edtuvazan key kenikew, wey ebeǥayan key kenikew te kelempusan te langun he ebeelan dey.