Salmo 89:3-28

³Kanam, “Waday intolag ko sin pinilik, siya nay inkarik sin baak ay si David:

⁴Awni et isaad ko din polim ay manturay si eng-enggana.”

⁵Idaydayaw daka koma ed daya sin nasinop ay nasantoan ay paparsua, tan nakaskasdaaw din inam-amag mo ya matalek ka.

⁶Tan sino di makaison sik-a sin amin ay wadad daya?

⁷Mas kaeegyat ya nangatngato ka mo din nasinop ay nasantoan ay parsua, isonga egyatan ya patgen daka.

⁸Yahweh ay Diyos ay Kangatoan ay Turay, magay makaison sik-a. Sin amin ay banag et matalek ka.

⁹Iturayam din kaeegyat ay baybay et patalnaem din dalloyona.

¹⁰Din dragon ay si Rahab et pinis-it mo. Begew sin panakabalin mo, inabak mo din kalaban mo.

¹¹Okam ed daya ya nan daga, tan inamag mo nan lobong ya din amin ay wada.

¹²Din wada ed amyanan ya abagatan, pinarsuam daida. Din dontog ay Tabor ya Hermon et manragsak da. Kaman dan ipogaw ay mangikankanta sin pangdayaw dan sik-a.

¹³Palalo ay napigsa ka.

¹⁴Din turay mo, kinalinteg di naisaadana. Din amin ay amagem, ipaila da ay managlayad ya matalek ka.

¹⁵Ay apaw di ragsak da din manaydayaw en sik-a babaen si kankanta ya din mabindisyonan begew sin kawadam en daida.

¹⁶Gapon sik-a, maninsin-agew ay manragsak da, et din kinalinteg mo, idaydayaw da.

¹⁷Tan sik-a di poon di bikas mi, begew sin seg-ang mo, mangabak kami.

¹⁸Nasantoan ay Diyos mi ay Israelita, sik-a din ari mi ay manalaknib en dakami.

¹⁹Waday kaman iitaw ay inpailam sin matalek ay baam, et siya na din kanam, “Binadangak di esay soldado ay napigsa, pinilik et inpangatok sisya.

²⁰Insaad ko ay ari si David ay baak. Sinoyatak din toktok na sin nasantoan ay lanak, say mangipaila ay sisyay dinotokak.

²¹Et kanayon ay papigsaek to babaen sin bikas ya panakabalin ko.

²²Din lawlawa di ogali na ay kalabana et adi da makaabak en sisya.

²³Gemkek din kalabana sin sangoanana et peslek din mangililiget en sisya.

²⁴Mantoltoloy din kinapodnok ya layad kon sisya et begew en sak-en, maipangatos sisya.

²⁵Paannawaek din lak-am di iturayana et lomabes sin baybay di pap-eng na.

²⁶Awni et bigbigenas sak-en ay Ama ya Diyos na, manalaknib ya mangisalakan en sisya.

²⁷Din kalintegan di besag ay anak, idawat kon to en sisya. Panbalinek ay kangatoan ay ari isnan daga.

²⁸Adi manbalbaliw din layad kon sisya, ya komakaman din intolag ko si eng-enggana.