Salmo 89:3-28

³Migkaǥi ka te, “Midhimu ku is kebpekid-uyun ku te suluǥuen ku he si David, he mibpilì ku he egkehimu he hadì. Ne iyan heini impesarig ku kandin:

⁴Is kada egkehimu he hadì te Israel ne ebpuun te menge kevuwazan nu taman te taman; is ginhedian nu ebpedayun te wazà pidtemanan.”

⁵Nengazen, is menge ilengiten he linimbag edalig te egkein-inuwan he menge vaal nu wey te kebmetinumanen nu.

⁶Wazà minsan sevaha ziyà te langit he iring kenikew, Nengazen. Wazà ilengiten he linimbag he igkepetug-iring kenikew.

⁷Edtehuzan ka ziyà te menge ketiǥuman te ilengiten he menge linimbag. Is langun he edliǥuy kenikew ne zuen dan kegkahandek kenikew.

⁸Nengazen he Megbevayà he Mekeǥeǥehem, wazà minsan hentei he iring kenikew; mekeǥeǥehem ka wey metinumanen diyà te langun he ebeelan nu.

⁹Edumelahan nu pinaaǥi te ǥehem nu is ebpemaǥel he zaǥat; ibpeengked nu is dezekelà he vaǥel zin.

¹⁰Midezeetan nu is dekelà he langgam he si Rahab ne mibpatey heini. Impedsusuwey nu is menge kuntada nu pinaaǥi te ǥehem nu.

¹¹Kenikew is langit wey is kelibutan; mibeelan nu is kelibutan wey is langun he netaǥù kayi.

¹²Mibeelan nu is dizaya wey is divavà. Is Buntud he Tabor wey is Buntud he Hermon iring heini is dezuwa te menge etew he egkanta te kegkelipey tenged kenikew.

¹³Mekeǥeǥehem ka! Utew subra is desen nu!

¹⁴Is kedhadì nu egkezumahan te ketazeng wey hustu he kukuman, wey egkezumahan daan te ǥaǥew wey kebmetinumanen.

¹⁵Nengazen, utew zeyzey is menge etew he nemekesaǥad te melipayen he ked-ugyab tenged kenikew, wey nengungubpaan tenged te hizu nu.

¹⁶Tenged te keupiya nu kandan, layun sikandan egkelipey. Ne edeliǥen dan is ketazeng nu.

¹⁷Ebpekezantal key tenged te zesen he imbeǥey nu kenami; ne tenged te keupiya nu kenami ed-umanan nu is egkehimu zey.

¹⁸Nengazen, Waǥas he Megbevayà te Israel, gaked nu is hadì dey he iyan kelasag dey.

¹⁹Dengan nekidlalag ka te metinumanen he menge suluǥuen nu pinaaǥi te kebpelawas nu kandan. Ke sikew te, “Midtevangan ku is sevaha he sundaru. Mid-aram ku sikandin puun te menge etew ku su para mehimu he hadì.

²⁰Si David he suluǥuen ku, iyan mibpilì ku he hadì pinaaǥi te kedlenahi kandin te segradu he lana ku.

²¹Is gehem ku eduma kandin wey edlig-en kandin.

²²Kenà sikandin egkelupiglupig te menge kuntada zin; ne kenà sikandin egkezaagdaag te menge lalung.

²³Ebekbeken ku ziyà te etuvangan din is menge kuntada zin taman te ebpemematey sikandan.

²⁴Ebmahalen ku sikandin wey ebpekid-uunungen a kandin. Ne ed-umanan ku is egkehimu zin pinaaǥi te ǥehem ku.

²⁵Ibpeiseg ku is keluag te ginhedian din su edhimuwen ku he puun dà te Daǥat he Mediteraneo ne taman en te Wahig he Eufrates.

²⁶Egkaǥi sikandin kayi te kediey te, ‘Iyan ka amey ku wey Megbevayè ku; iyan ka endilungè ku wey menluluwas ku.’

²⁷Ed-isipen ku sikandin he kinekekayan he anak ku, iyan sikandin lavew te langun he menge hadì.

²⁸Ebpedayun is kebmahala ku kandin te wazà pidtemanan, ne kenà egkaawà taman te taman is kebpekid-uyun ku kandin.