Salmo 81:4-14

⁴Su iyan heini sulunuzen te menge tig-Israel. Su suǥù heini te Megbevayà ni Jacob.

⁵Impenurù din heini he penurù te menge kevuwazan ni Jose hein midsurung din is Ehipto. Nekezineg a te laǥeng he wazè ku mekilala he edhenduen te,

⁶“Impelingkawas ku sikiyu te kegkeuripena keniyu; in-awè ku is menge meveǥat he uwiten niw.

⁷Hein egkereǥenan kew mid-umew a keniyu ne midlibri ku sikiyu. Ne ziyà te mid-elesan ku he kivel midtavak ku is umew niw. Ne migezaman ku sikiyu ziyà te serebseb te Meriba.

⁸Sikiyu is menge etew ku he menge tig-Israel, pemineǥa niw is petizaan ku keniyu. Deyzey pezem ke ebpemineǥen a keniyu!

⁹Kinahanglan he liyu kedì, kenè kew med-azap te zuma; kenè niw ezapa is tarù he menge Megbevayà.

¹⁰Iyan a kes Nengazen he iyan Megbevayè niw he iyan kes mibpeǥawas keniyu ziyà te Ehipto. Buyù kew kayi te kediey ne ebeǥayan ku sikiyu te menge kinahanglan niw.

¹¹Piru sikiyu is menge Israilihanen he menge etew ku, wazè kew mebpemineg wey mebpezumazuma kedì.

¹²Umbe, mibpesagdan ku sikiyu te kebmesinupaken niw, ne mibeelan niw is egkesuatan niw.

¹³Emun pezem ebpemineg kew kedì wey edtumanen niw is menge paaǥi ku,

¹⁴ne diritsu ku zà edsiluti wey edaaǥa is menge kuntada niw.