Salmo 80:2-16

²ipailam kod panakabalin mo en dakami ay polin Efraim ya tribun da Manasses en Benjamin, omali ka ay en omisalakan.

³Apo Diyos, itaolim kod din sigod ay kasasaad mi. Maseg-ang ka koma ta isalakan mos dakami.

⁴Yahweh ay Diyos ay Kangatoan ay Turay, adi ka kod pabayagen san bonget mo en dakami ay ipogaw mo ta dengngem nan adawag mi.

⁵Kaman ladingit di inpakan mon dakami ya ad-ado ay lowa di inpainom mon dakami.

⁶Inpalobos mo ay din kaibaw mi sin nandinmang ay il-ili yan pan-iibawan da din daga mi ya sis-iyekan das dakami.

⁷Diyos ay Kangatoan ay Turay, itaolim kod dakami sin sigod ay kasasaad mi. Maseg-ang ka kod ta isalakan mos dakami.

⁸Esa ay obas di kaiarigan mi ay ipogaw mo ay en ka inkaan ed Egipto, et inmolam si odom ay daga ay inpakaan mo di ipogaw na.

⁹Nilinisam din daga ta say gomabayana. Linmamot et kinmalapkap sin intiro ay daga.

¹⁰Din dontog ya dadakke ay kaiw et linidomana.

¹¹Dinmateng sin baybay din panga na enggana sin ginawang sin bas-il na.

¹²Apay nga dinadael mo din alad na et amin ay malabas yan alaen dan lames na?

¹³Din bango et dadaelen da ya din odom ay animal et kanen da.

¹⁴Diyos ay Kangatoan ay Turay ay wadad daya, mansagong ka koma. Man-osdong ka ta ilaem ya ayowanam dana,

¹⁵nan obas ay en ka inmola.

¹⁶Kinsat di kaibaw mi ya pinooan da. Ilaem kod ta dosaem daida.