Salmo 78:18-61

¹⁸Midtivevè dan gezami is Megbevayà pinaaǥi te kebuyù dan te ampey zan he keenen.

¹⁹Mid-insultuwan dan is Megbevayà pinaaǥi te kegkaǥi zan te, “Kenè kiw vuwa igkepekaan te Megbevayà kayi te sibsivayan.

²⁰Tutuu iyan he hein midtabpì din sikan is batu ne migawas is wahig, piru egkeveǥayan kiw zin be zaan buwa te supas wey usa is menge etew zin?”

²¹Umbe, nepauk is Nengazen te kegkezineǥa zin kandan. Iring te hapuy is pauk din te menge tig-Israel he menge kevuwazan ni Jacob.

²²Su wazè dan kedtuu kandin, ne wazè dan medsarig he edlibriyen din sikandan.

²³Piru minsan pa te iyan haazà, midsuǥù din is langit he med-abri,

²⁴ne mibpeud-uzanan din sikandan te keenen he egngezanan te ‘manna’. Imbeǥey zin kandan is keenen he ebpuun te langit su wey zan mekaan.

²⁵Sikandan is menge etew zà duen, nekekaan dan te keenen te menge velinsuǥuen. Ne impezahar te Megbevayà heini he keenen diyà te kandan.

²⁶Impepengeramag te Megbevayà te keramag he ebpuun te edsilaan wey edsenlepen pinaaǥi te ǥehem din.

²⁷Ne mibpantad is menge tagbis he impeuzan-uzan din diyà te kandan.

²⁸Impelugtanè din haazà diyà te ebpekeliǥuy te menge tulda zan duen te kampu zan.

²⁹Umbe, nekekaan sikandan ne nengahantey zan, su imbeǥey te Megbevayà kandan is egkesuatan dan.

³⁰Ne zutun te ebpetakè en sikandan egkaan,

³¹nepeukan sikandan te Megbevayà. Mibpenhimetayan din is tig-Israel he menge vetan-en he memeupiya is kedlelawa wey memezesen.

³²Piru minsan pa te neseǥazan dan heini is langun he egkein-inuwan he mibpemeelan te Megbevayà, wazè dan med-engked he ebaal te salà wey wazè dan medtuu kandin.

³³Umbe, migègaanan din tepusa is menge untung dan pinaaǥi te netik-ew he kezeetan.

³⁴Ne hein mibpenhimetayan din is duma kandan, ne is duma zuen te nengesamà, midsendit dan ne midangep dan diyà te kandin ne zekelà is suat dan te tavang din.

³⁵Neisip dan he iyan endilungè dan wey edlibri kandan is Utew Lavew he Megbevayà.

³⁶Piru kenà diyà ebpuun te ǥehinawa zan is kedeliǥa zan kandin su menge teruen sikandan.

³⁷Kenà meheǥet is gehinawa zan diyà te kandin; kenè dan metinumanen te kebpekid-uyun kandan.

³⁸Minsan pa te iyan heini, hihizuwen gihapun kandan is Megbevayà. Mibpesaylu zin sikandan te menge salè dan ne wazè din sikandan dèdeeti. Layun din ed-eǥena is pauk din kandan minsan utew en sikandin egkepauk.

³⁹Midtentenuzan din he menge etew zà sikandan, he iring te keramag he edlavey zà su ebpematey sikandan.

⁴⁰Diyà te sibsivayan, layun dan edsupaka wey ebeǥayi te seeng is Megbevayà.

⁴¹Layun dan egezami is Megbevayà; ebeelan dan is igkeepes te Waǥas he Megbevayà te Israel.

⁴²Midlipatan dan is gehem din he impeehè din hein midlibri zin sikandan te kegkeiza kandan te menge kuntada zan,

⁴³ne midlipatan dan sikan is egkein-inuwan he mibeelan din diyà te Zoan he sakup te tanà he Ehipto.

⁴⁴Midhimu zin he lengesa sikan is edtudà he menge wahig te menge tig-Ehipto, umbe wazà egkeinum dan.

⁴⁵Mibpehurepunan din sikandan te utew subra he langew para merasey sikandan; impelepew zin is gerabi he menge vakbak he nekezezaat te menge pinemula zan.

⁴⁶Impekaan din te terapan is menge pinemula zan wey menge abut dan.

⁴⁷Mibpendèdeetan din is menge perasan dan wey menge kayu zan he sikemur pinaaǥi te ǥiyew.

⁴⁸Mibpenhimetayan din is menge uyaǥen dan pinaaǥi te ǥiyew wey kilat.

⁴⁹Tenged te utew zin kegkepeuki kandan, midsuǥù din is duma zuen te menge velinsuǥuen din te kedezaat kandan.

⁵⁰Wazè din eǥena is pauk din; wazè din sikandan libriya te kemetayen, kekenà, mibpenhimetayan din sikandan pinaaǥi te mezaat he menge hitavù.

⁵¹Mibpenhimetayan din is langun he penganey he menge anak he maama diyà te Ehipto, he iyan kes menge kevuwazan ni Ham.

⁵²Impeǥawas din puun te Ehipto is menge etew zin he iring te menge kerehidu he migiyahan din diyà te sibsivayan.

⁵³Midumahan din sikandan, umbe wazà sikandan mahandek. Piru nengelened mulà diyà te zaǥat is menge kuntada zan.

⁵⁴Mid-uwit din sikandan diyà te tanà he mibpilì din; diyà te menge vuntud he mid-aǥew zin pinaaǥi te ǥehem din.

⁵⁵Midsegseg din sikandan pehendiyà te meziyù te menge etew zin, ne mibahinbahin din haazà is tanà. Mibehinan is kada tribu te Israel su para maangken dan haazà, ne zutun din sikandan ipeubpà.

⁵⁶Iyan, migezaman dan is Utew Lavew he Megbevayà, su midsupak dan sikandin ne wazè dan tumana is menge suǥù din.

⁵⁷Iring te menge kepuun dan, mibpekeziyuan dan wey midluivan dan is Megbevayà. Ne iring sikandan te nevadtì he panà su kenà sikandan egkeseriǥan.

⁵⁸Midhimu zan he mepauk wey mebpengelikud kandan is Megbevayà pinaaǥi te kebangun dan te menge simbahan diyà te metikang he menge lugar wey te ked-azap dan te zuma he menge ed-ezapen.

⁵⁹Netuenan te Megbevayà heini is mibeelan te menge tig-Israel, umbe nepauk sikandin ne mid-iniyuǥan din en sikandan.

⁶⁰Mid-ewaan din sikan is tulda zin diyà te Shilo he iyan ubpeey zin kayi te kelibutan.

⁶¹Intuǥut din he maaǥew te menge kuntada sikan is Kavan te Kebpekid-uyun he simbulu te kegkemekeǥeǥehem din wey kegkelavew zin.