Salmo 77:3-14

³Emun ebpurungan ku egngunngunua is Megbevayà egkesuǥey a ne egkaawà is perateng ku.

⁴Wazè e zin ipelipezeng; kenè ku egketuenan ke hengkey is egkeǥiyen ku, su utew a nesemuki.

⁵Ed-isipen ku is nemenlavey he menge andew wey is menge tuig he neuǥet en he nenlavey.

⁶Emun mezukilem ne mezalem is ed-is-isipen ku. Ebpurung a egngunùngunù ne iyan heini menge insà he neuma te isip ku:

⁷“Taman en be vuwa te taman is ked-iniyuǥi kenami te Nengazen? Kenà key en buwa ebpekepenunuat kandin?

⁸Kela ke naawè en is kebmahala zin kenami? Kenè din en buwa edtumanen is penangdù din?

⁹Kela ke nelipat en sikandin he egkehizu? Kenè en be sikandin egkehizu tenged te pauk din?”

¹⁰Ne ke siak te, “Is ibmesakit te ǥehinawa ku iyan is: kenè en bes edtavang kenami is lavew he Megbevayà.”

¹¹Nengazen, edtentenuzan ku is menge vaal nu. Uya, edtentenuzan ku is egkengein-inuwan he mibeelan nu zengan.

¹²Ed-isipen ku wey egngunùngunuen is langun he mekeǥeǥehem he menge vaal nu.

¹³He Megbevayà, is menge paaǥi nu ne kenà iring te menge paaǥi te zuma. Wazà ebpekerepeng te kegkemekeǥeǥehem nu.

¹⁴Iyan ka Megbevayà he mibaal te egkengein-inuwan. Ibpeehè nu te menge etew is gehem nu.