SALMO 73:6-28

⁶Sukaman kikinkunalla kreyinakushpankuna sufrichikushpalla kawsansapa.

⁷Tukuy layayuk kashpankuna tukuy mana alli munanankunallata ruransapa.

⁸Tukuy pita mana nimatashina kawansapa. Mana pinkakushpa kikinkunalla alabanakunsapa. Tukuy pita jorachinsapa mana allita ruranankunapa sufrichinankunapa.

⁹Sukaman mana allita rurashpankuna willansapa Tata Diosta mana kasunayanankunata. Runakunatapish washanchansapa.

¹⁰Chayrayku runamasinkuna paykunata alabansapa. Paykunata sukaman kreyinsapa.

¹¹Rimansapa: “Tata Dios mana alli rurananchikunata mana yachankachu. Sielupi kawsak Tata Dios mana nimata yachanchu.”

¹²Chay mana alli rurak runakuna mana nimapi sufrishpankuna kullkiyansapa.

¹³Chayta kawashpa yuyarkani: “Llullakushpa alli shunkuyuk runa kawsaykani. Llullakushpa allillata rurashpa kawsaykani.

¹⁴Tukuy oras sufrini. Tukuy diya Tata Dios kastigawan.”

¹⁵A, Tata Dios, chay mana alli rurak runakunashina chayta rimashpaynika kreyishukmasinikunata llullachiymansapa karkan.

¹⁶Chayta yuyashpayni mana atiparkanichu entiendiyta imapami Tata Dios mana uchankunarayku kastigansapa nishpa.

¹⁷Tata Diospa wasinpi yaykushpaynira allita yacharkani Tata Dios chay mana alli rurak runakunata kastiganankunata.

¹⁸A, Tata Dios, kanmi chay mana alli rurak runakunata churashkanki llukchak ñanpishina uchallikuptinkuna kulluchinaykipasapa.

¹⁹Raslla paykunata kastigankisapa. Paykunaka manchakuywan wañunkasapa.

²⁰Paykuna llullachinakuptinkunapish kan, Tata Dios, kastigakunayki diya chayamuptin tukuy mana alli rurashkankunata tukuy runakunata kawachinkisapa.

²¹Chay mana alli rurak runakunata kawashpa sukaman turbakurkani. Turbakushpa sukaman llakirkani.

²²A, Tata Dios, mana nima yachak kashpayni ñawpaknikipi suk animalshina karkani.

²³Chashna mana entiendiptinipish kanka kuyawashpa mana sakiwashkankichu. Makinimanta apiwashpa purichiwakshina yanapawashkanki.

²⁴Yachachiwashpa yanapawashkanki allita rurashpa kawsanaynipa. Chaymanta kawsanaykipi kushikushpa chaskiwanki.

²⁵Kanlla sielumanta yanapawanki. Kanwan kawsashpayni mana nima ashwanta munanichu.

²⁶Sukaman sampayaptinipish, kan tata Dios, mana tukuyniyukta kuyawashpa yanapawanki.

²⁷A, Tata Dios, mana kasushunayak runakuna wañunkasapa. Kanmi mana kreyishuk runakunata kulluchinkisapa.

²⁸Paykuna mana kreyishuptinkunapish ñukaka kanwan tantalla kawsanayani. Kanmi, Tata Dios, amachawanki. Chayrayku runamasinikunata willashasapa alli rurak kanaykita.