Salmo 72:4-17

⁴Berakat he edlevanan wey edtevangan te hadì is menge egkaayuayu, ne edaaǥen din is menge etew he edaagdaag kandan.

⁵Berakat he ebpedayun is kedhadì din te wazà pidtemanan pinaaǥi te kegkehimu he hadì te menge kevuwazan din, mintras duen pa andew wey vulan.

⁶Berakat he egkeiring sikandin te uzan he ebpekeveǥey te wahig kayi te kelibutan.

⁷Dutun te timpu te kedhadì din, berakat he kenà egkaawà is ketazeng ne kenà egkaawà is kegkemeuswaǥen te ked-ubpà te menge etew taman te taman.

⁸Berakat he is ginhedian din ebpuun te sevaha he zaǥat ne taman en te sevaha pa he zaǥat, wey puun te Wahig he Eufrates ne taman te kinemeziyuan he vahin te kelibutan.

⁹Berakat he mebpesakup kandin is menge kuntada zin he ziyà ebpemen-ubpà te sibsivayan.

¹⁰Berakat he is menge hadì diyà te Tarshish, menge pulu, wey te Sheba, ebeǥey ziyà te kandin te menge ǥasa te kebpekilala he ebpesakup sikandan kandin.

¹¹Berakat he ebpesakup kandin is langun he menge hadì ne ebpenilbi kandin is langun he menge nasyun.

¹²Su edtevangan din is pinesagdan he menge egkaayuayu, he ebuyù te tavang diyà te kandin.

¹³Egkehizuwan din is menge wazà egkehimu wey egkengaayuayu, ne edtevangan din su wey kenà sikandan ebpatey.

¹⁴Edlibriyen din sikandan te kedèdaaǥa wey kebpesipelahi kandan, su utew mevali sikandan diyà te kandin.

¹⁵Berakat he luǥeyazi te untung is hadì! Berakat he ebeǥey kandin te vulawan is Sheba. Berakat he layun sikandin id-ampù he tuvazi sikandin te Megbevayà.

¹⁶Berakat he mebeǥey te menge abut is tanà minsan is puntur te menge vuntud, ne meiring te Lebanon he utew uuzaran. Berakat he mebmahabet is ebpemen-ubpà diyà te menge inged, meiring sikandan kezakel te menge sagbet diyà te menge vevesukà.

¹⁷Berakat he kenà egkelipatan is ngazan te hadì te taman te taman mintras duen pa andew. Berakat he pinaaǥi kandin edtuvazan is langun he menge nasyun, ne ebpekekaǥi is menge etew ziyà te menge nasyun te, “Deyzey sikandin.”