Salmo 71:1-22

¹Sik-a ay Diyos di pankamangak, adim kod polos ipalobos ay maibabainak.

²Bomadang ka tan nalinteg ka, dengngem kod adawag ko ta omisalakan ka.

³Maiarig kas makneg ay bato ay pantabonak ay kanayon ay pankamangak. Inkeddeng mo ay omisalakan ka, din pankamangak ya salaknib ko et sik-a.

⁴Diyos ko, omisalakan ka koma sin managbasol ay magay seg-ang da ya mangam-amag si lawa.

⁵Tan sik-a, Kangatoan ay Diyos, di pannamnamaak, manipod kakitkittoy ko, sik-ay nantaltalkak.

⁶Sik-a di nantalkak sin intiro ay biyag ko, manipod naianakak sik-ay salaknib ko, idaydayaw kos sik-a si amin ay timpo.

⁷Ad-adoy masmasdaaw sin biyag ko, ngem sik-ay napigsa ay salaknib ko.

⁸Maninsin-agew ay idaddad-at ko din kaidaydayawam ya kinangatom, Apo.

⁹Adi ka koman bomaybay-an mo makayak, adi kan tomaytaynan mo komapsotak.

¹⁰Tan din kalaban ko yan mantotolag da, planoen da di pomsean da.

¹¹Kanan da, “Enggay binaybay-an Diyos sisya. En tako depapen tan magay mangisalakan en sisya.”

¹²Apo, somag-en ka koma, dalasem ta bomadang ka.

¹³Din omipabpabasol et sapay koma ta madadael ya maibabain da. Malaslasoy da ya maabak da et koma din manpanggep ay pomaligat da.

¹⁴Mo sak-en pay, kanayon ay mannamnamaak en sik-a, masepsep ay idaydayaw kos sik-a.

¹⁵Idaddad-at kon to din siged ay inam-amag mo. Inag-agew ay dad-atek din panangisalakan mo, olay mo adiak maawatan ay kosto.

¹⁶Enak idaydayaw sik-a, Apo, gapo sin panakabalin mo. Dad-atek din kinalinteg mo, sik-a anggoy, magay odom, Apo.

¹⁷Initdoam sak-en manipod sin kakitkittoy ko, et kanayon ay indaddad-at ko din nakaskasdaaw ay inam-amag mo.

¹⁸Isonga olay naobananak si kinalakay ko, adi ka kod bomaybay-an, Apo. Komadkadwa ka ay Apo sin pangidad-atak si panakabalin mo sin amin ay maipolin to.

¹⁹Edasanad daya din kinalinteg mo, nakaskasdaaw din inamag mo, magay makaison sik-a, Apo.

²⁰Inpawadam di problima ya ligat ko, ngem itaolim din bikas ko ya omisalakan ka sin pese, Apo.

²¹Masepsep ay ipangatom din dayaw ko ya pabikasem nemnem ko.

²²Sik-a ay Diyos ko, mankantaak ya mantokarak si arpa ay mangidaydayaw en sik-a, tan napodno ka, nasantoan ay Diyos ay daydayawen di Israelita.