Salmo 66:10-17

¹⁰He Megbevayà, iyan tutuu is migezaman key kenikew; midhimu key kenikew he lunsey iring te pelata he midlunsey pinaaǥi te hapuy.

¹¹Intuǥut nu he meutel key wey impevavè key kenikew te meveǥat he uwiten.

¹²Mibpetekutakan key kenikew te menge kuntada zey; iring key te mideleman wey nekeǥawas puun te nevinsulan. Iyan, guntaan midhimu nu en he meupiya is kebpekesavuk dey.

¹³Ebpemuhat a ziyà te valey nu te menge pemuhat he edtutungen. Edtumanen ku is menge penangdù ku ziyà te kenikew,

¹⁴he migkaǥi ku kenikew hein egkereǥenan a.

¹⁵Ebpemuhat a ziyà te kenikew te melambù he menge uyaǥen he kerehidu, tudu he vaka, wey kambing. Iyan heini pemuhat he edtutungen.

¹⁶Sikiyu is langun he edtahud te Megbevayà, hendini kew wey a keniyu pemineǥa; edtudtulan ku sikiyu ke hengkey is mibeelan din kedì.

¹⁷Mibuyù a te tavang diyà te kandin ne midalig ku sikandin.