Salmo 65:1-10

¹He Megbevayà, ereg ka he edeliǥen dey ziyà te Zion! Ne edtumanen dey is penangdù dey kenikew.

²Is langun he menge etew ed-uvey ziyà te kenikew su edtevaken nu is menge kebpengemuyù dan.

³Minsan mahabet is menge salè dey, ebpeseyluwen key ǥihapun kenikew.

⁴Deyzey is etew he mibpilì nu wey midhinggat nu he ziyà med-ubpà te valey nu. Diyà te valey nu he iyan kes segradu he ubpeey nu egkeveyangan key te meupiya he menge vutang.

⁵He Megbevayà he menluluwas dey, edtevaken key kenikew pinaaǥi te egkein-inuwan he menge vaal he mibeelan nu te kedlibriya nu kenami. Iyan ka ebpekeveǥey te keupiyaanan te menge etew kayi te tivuuk he kelibutan.

⁶Mekeǥeǥehem ka, ne pinaaǥi te kegkemekeǥeǥehem nu insavuk nu is menge vuntud.

⁷Ibpeengked nu is rekabù te menge vaǥel wey keǥurub te menge etew.

⁸Minsan sikan is diyà ebpemen-ubpà te meziyù ne nengahandek kenikew, tenged te egkein-inuwan he menge vaal nu. Ebpekeugyab te kegkelipey is menge etew kayi te tivuuk he kelibutan tenged kenikew.

⁹Ed-etimanen nu is tanà wey ebpeuzanan nu, ne midhimu nu he mekeveǥey te sebpet. He Megbevayà, is menge wahig nu kenà egkemezahan, ne ebeǥayan nu te sebpet is menge etew. Id-andam nu is tanà he uuzaran.

¹⁰Ebpeuzanan nu is ineradu he tanà taman te ebmeyunek heini, ne edtuvazan nu is nenuvù he menge pinemula.